Baǵyty - quzar shyń, asqar taý,

Barady órmelep bireýi.

Ózgesi esi joq, deni saý,

Etekten tartqylap kúledi.

Kóre almaı ózgeniń jeńisin,

Qyzǵanysh kúıdirip, jandyrar.

Terip jep basqanyń jemisin,

Qý, aram óz qarnyn toıdyrar.

Kózimen aldaıdy, arbaıdy,

Basqanyń baǵyna talasyp.

Dos-nápsi qýlyqty qarmaıdy,

Jetektep barady qyr asyp.

Ketkeli syr qashan sezimnen,

Súıedi bir-birin aqsha úshin.

Ǵashyǵyn júrekpen sezingen,

Joǵaltqan mahabbat óz kúshin.

Ananyń aıtqanyn – bos sóz, dep,

Óz «bilem» degenmen júredi.

Ákeniń qabaǵyn – bos kóz dep,

Aqylyn ańǵarmaı, kúledi.

Bárin de bilerdeı oqymaı,

Satyp ap dıplom máz bolar.

Túk bilmes úırenbeı, toqymaı,

Urpaqpen qaısybir el ońar?!

Tabatyn tabysy aram qun,

İshkeni irińdeı, qý araq.

Ákege qalaısha aıtam syn,

Anasy bolsa, áne, las, salaq.

Urpaqqa kim aıtar aqyldy,

Joq bolsa súıener aǵasy?!

Qattyraq qys-taǵy taqymdy,

Ómirdi súr... túsken baǵasy...

Bárin aıt, máni joq, birin aıt,

Tizilgen «mınýs» kóp, degenmen.

Júrektiń jaǵdaıyn bilip qaıt,

Jylaıdy ol, kózderiń kúlgenmen.

Al, myna álemge zer salyp,

Júrekpen úńilip qarashy?

Taǵy bir qyryn sen al, tanyp,

Jaqsy álem osy dep sanashy?!

Meıirim ár berip júzine,

Alaqan jylýy ketpegen.

Jylylyq ornatar júzińe,

Júrekte kóktemi kóktegen.

İsteri saı bolyp sózine,

Turatyn berik, nyq ýádede.

Senimmen qaraıtyn kózińe,

Jalyndap turatyn ár keýde.

Sezimdi baǵalap, syılaıtyn,

Ǵashyqtar toly álem – bul álem.

Dostaryn, jamanǵa qımaıtyn,

Jaqsylyq kútetin tek senen.

Ardaqty ata-ana, kókeler,

Jaqsy dos, adal jar, sanaly ul.

Baqytty bolýǵa jeteler,

Álemniń sanaýly syry bul.

İzdenip ilimdi jan-jaqtan,

Talpynǵan eńbek pen jeńiske!

Ár jannyń kózinen syr baqqan,

Jibermes dostaryn eńiske!

Búr jarǵan aǵashqa súısinip,

Sıpaǵan jetimniń basynan.

Syryńdy janymen túısinip,

Ketpegen qıyn sát qasyńnan.

Baryna qanaǵat qylatyn,

Baǵasyn biletin «jaquttyń».

Bul álem jaqsylar turatyn,

Mekeni sıaqty baqyttyń.

Bul álem biz ómir súretin,

Tarazy sekildi teń tartqan.

Bir jaǵy jaqsylyq súıetin,

Bir jaǵy jamandyq, muń artqan.

Eki túr, eki ajar, eki adam,

Eki álem sekildi kereǵar.

Osy bir eki álem ishinen,

Adamnyń janyn kim kóre alar?!...

Maqpal Sembaı