"Endi ózimiz bir jaqsylap shaı ishsek"... 

Qonaqtar ketken soń árbir úıde aıtylatyn sóz... Iá, qonaqtar qaıtqannan keıin, qonaqqa baryp kelgen soń, ózińmen-óziń bolyp otbasyńmen birge jaqsylap sháı ishkiń keledi osy, ıá? 

Bizdiń úıde ákem – shaıqumar adam. Oqýshy kezde anam bir jaqqa ketkende, ne jumysymen qarbalas bolyp jatqanda, túnde uıyqtar kezde "erterek, tezirek" jatyp qalaıyn deseń, ákem shaı ishkisi kelip qalatyn. Kúnde. Shaı daıyndap berýge eringen kezde, "tezirek" jata qalaıyn deseń, "jaı ǵana sháınekti bir qaınatyp, "mynda" qoıa salsań, ózim quıyp ishe beremin. Sút jetedi. Qant bolsa, bere sal. Qurtty qoıa salsań bolady... Kámpıt joq pa eken? Ózim quıyp ishe beremin"...

Iá, sóıtip burqyldap júrip, daıyndap beretinmin. Keıde shyn nıetimmen, shyn kóńilimmen daıyndap beretin kezderim de boldy. Biraq ondaı sátter az edi. Al, anam bolsa, qashan bolsa da, qandaı kúıde bolsa da, ákeme as-sýyn daıyndap turatyn. Ózi ishpese de, ákem shaıyn iship bolǵansha sháýgiminiń sýyp qalmaýyn qadaǵalap, "aıaǵyna" deıin" otyratyn. Keıde tipti, baǵana aıtyp ketkendeı, túnniń bir ýaǵynda shaı ishkisi kelse, anam janynda sháýgimin "qushaqtap" otyratyn. Ákem kózde  – kózildirik, qolda – gazet, asyqpaı baptap iship otyra beretin. "Kim quıyp jatyr, ol qarbalas pa, sharshap otyr ma, aýyryp otyr ma?" asa mán bermeıtin. Shaıy bitse, tipti kóz salmastan áıteýir shaı quıylatyn jaqqa kesesin usynatyn da, qaramaıtyn. Tek gazettiń arǵy jaǵynan shaıymen qaıtatyn kesesin kútip sozylǵan qoly ǵana turatyn. Keıde tipti anam qalǵyp otyratyn. Sonda ákeme "Túý, tez-tez ishseńizshi! Mamam uıyqtap otyr ǵoı!" dep, "ursatynmyn". "Men boldym. Jınaı berińder. Sháınekti, qurtty, qantty qaldyr da, qalǵanyn jınaı ber" - dep ákem sasyp qalatyn.

Anam qaıtqan soń, shaı quıýdy úlken jeńgem "ıemdendi". Ol kóp shaı ishpeıtin. Basyn jeńgem bastap, men aıaqtaıtynmyn. Balalary kishi bolǵan soń, "men boldym, jınaı berińder" dep ákem aıtqan soń, bala qamymen turyp ketetin jeńgem. Ákem "boldym" degen soń, 3-4 kese ishetin (keıde odan kóp shyǵar). Sondyqtan, ary qaraı men quıatynmyn.

Anamnyń jyly ótken soń, ekinshi aǵam úılendi. O! Alaqaı! Jeńgeli boldym taǵy da! Biraq eki ese qýanýǵa taǵy bir sebep bar edi. Úlken jeńgem ekeýmiz sheksiz qýandyq! Ekinshi jeńgem shaı ishkendi jaqsy kóredi eken! Sóıtip, ákeme "aıaǵyna deıin" "shydap" sháı quıý "avtomatty" túrde ekinshi jeńgeme ótti. Qazir aýylǵa barsań, ózimizge de, kóp qonaq shaqyrsań da, ekinshi jeńgem shaıdyń basynda otyrady. Ózine jarasymdy. Asyqpaı, bappen quıady. Bastysy - erinbeıdi, shydaıdy. Rahmet, jeńge! 

PySy: ...biraq keıingi kezde ákeme shaı daıyndap berip, ózim de birge ishkim kelip júrgeni-aı...

Sizder de qonaqty shyǵaryp salyp, ne qonaqtan keıin ózderińiz bolyp shaı ishesizder me?