Óz basym bılik pen Úkimettiń qalaı jumys istep jatqanyna Astanada júrgen ózimniń emes, elimizdiń sonaaaaý túkpirinde, oblys ortalyǵy Túrkistan qalasynan 500 shaqyrym qashyqta qalyp qoıǵan, jarty mıllıon halqy bar Myrzashól óńirinde, qazirgi zamanaýı órkenıetten alysta turyp jatqan jerlesterim men aǵaıyn-týystarymnyń kúndelikti kúıbeń tirshilikterine qarap baǵa beremin.

Elordamyzdan Shymkentke barý ońaı, al Shymkentten Maqtaaralǵa jetý - qıynnyń qıyny. Shymqaladan Saryaǵashqa deıin ǵana durystaý bolǵanymen, ary qaraı sol baıaǵy tap-tar, jamaý-jasqaý jol.

Túrkistan oblysyndaǵy Jetisaı men Atakentten Maqtaaral aýdanynyń ortalyǵy Myrzakent kentine aparatyn, keńes zamanynan beri kúrdeli jóndeý kórmegen joldar burynǵy shurq tesik qalpynda.

Myrzakentten Shardara arqyly Túrkistan oblysynyń qazirgi ortalyǵyna qaraı júretin joldardyń da jaı-kúıi sondaı.

Atakentten ózimiz ósip-óngen, kindik qanymyz tamǵan bizdiń "Tegistik" aýylyna baratyn joldyń jaı-kúıi de sol. Aýyldyń ishindegi kóktem men jazda topyraq pen shań-tozańǵa kómilip, kúz ben qysta balshyq-batpaqqa batyp jatatyn kósheler týraly aıtpaı-aq qoıaıyn.

Myrzashól óńirindegi alys aýyldardyń búgingi ahýaly jóninde keıingi eki-úsh jyldyń ózinde Elbasymyz ben Úkimetke júzdegen hat joldaǵan shyǵarmyn.

Elbasymyzdyń ózi arnaıy tapsyrma berip otyrsa da, Úkimet basshylary Túrkistan oblysynyń ákimine siltep, "sen salar da, men salar, atqa jemdi kim salar" degenniń keıpin keltirip otyr.

Bizdiń osy "Tegistik" aýylynyń turǵyndary óz aýyldarynyń ákimderi, aýdandyq máslıhattyń depýtattary kim ekenin bilmeıdi de.

Al oblys, aýdan ákimderiniń tóńiregine jaǵympazdardy jınap alyp ótkizetin jyl saıynǵy esep berý jınalystaryndaǵy "qyryq ótirikterine" qarapaıym halyq senýden qalǵan.

İni-baýyrlarym aýylda jumys joq bolǵandyqtan kelinshekteri men bala-shaǵasyn áke-shesheleriniń qoldaryna tastap, ózderi otbasyn asyraıtyn nandary men nápaqalaryn basqa jaqtan izdep, elden jyraqta, jan-jaqta júr.

Joǵary bilimi men dıplomy bar qaryndastarymyz ben kelinderimiz amalsyz úılerinde otyr.

Bizdiń aýyl jaqtaǵy mektepterge muǵalim bolyp jumysqa turýdyń aqysy (parasy) bir mıllıon teńgege jetipti. Onda da óz kezegińdi kútýiń kerek eken.

Iaǵnı qaryzdanyp, bankten nesıe alyp, mektep dırektoryna bir mıllıon teńgesin aldyn-ala aparyp berip qoıǵandardyń ózi qyzmetke alatyn "baqytty sátti" kútip, jumys istep júrgen muǵalim qyz-kelinshekter qashan turmysqa shyǵyp, dekrettik demalysqa qashan ketedi eken, qashan oryndaryn bosatady eken dep eki kózderi tórt bolyp kezekte turǵan kórinedi.

Memleket búdjetinen "bos júrgen jastardy oqytamyz, kásiptik bilim beremiz, jumys oryndaryn ashyp, soǵan ornalastyramyz" dep mıllıardtaǵan qarjy bólinip jatyr.

Ózim ósip-óngen "Tegistik" aýylynyń jastary sonaý esepsiz qarajattyń bir tıyn da kómegin kórgen emes!

Sonaaaý Myrzashóldegi alys aýyldar ǵana emes, elimizdiń túkpir-túkpirindegi barlyq eldi mekenderdiń qazirgi jaǵdaıy osyndaı deýge bolady!

"Dúnıeniń tetigin zamanǵa saı bilimdiler ustaıdy" dep ózimizdi ózimiz aldap qoıamyz.

Alaıda, aýylda jumyssyz júrgen aǵaıyndarym men kelin-qaryndastaryma kómektese qoıaıyn desem, jan-jaǵymyzdy jemqorlyq jaılaǵan myna dúnıede meniń de qolymda turǵan eshqandaı tetik joq.

Ókinishke qaraı, ol tetikter negizinen aram aqshamen baıyǵandar men kıiz qazyqtyń ózin jerge kirgizip jiberetin "toqpaǵy myqtylardyń" qolynda tur búginde!

Kúni keshe quramy jańarǵan myna Úkimetten ańǵal da, aqkóńil qazaq úlken úmit kútip otyr!

Aınalaıyn, Úkimet!

Shydamnyń da shegi bar! Qarapaıym qara halyqty ashyndyrmaı, óz mindetińdi adal atqar!

Myrzantaı Jaqyptyń Facebook paraqshasynan