Qamshy.kz aqparat agenttigi qazaqtyń mańdaıyn bitken dara tulǵasy, qazaq atyn kúlli álemge tanytqan kúmis kómeı ánshi Dımash Qudaıbergenge arnap jazǵan qazaq aqyndarynyń jyrlaryn usynady.

Dara

Bere me birden naryqtyń parqy baǵasyn,

Shalqardyń kólik sekildi shalqyp aǵasyń.

Mıllıardtar eli juldyz dep qol soqty, Dımash,

Juldyzyń seniń dodada jarqyraǵasyn.

 .

Úrimde jolyń ashylsyn, Qyrymda baǵyń,

Baıǵazy desem osy óleń

Yrymdaǵanym...

Júrekke jetti bulbuldaı quıqyljytqanyń,

Boztorǵaı syndy kógimde shyryldaǵanyń.

.

Juldyzdy ánsiz bul qazaq jamyrata ma,

Áýensiz kúnim bata ma, tańym ata ma?!

Qol soqty saǵan qytaı men ormandaı orys,

Qol soqty syndy Parıjde Ámire atańa.

.

Qýat ap esken dalanyń samaly kúnnen,

Jańalyǵyńnan janymnyń janary kúlgen.

Sırek ún, dara daýys dep dabyrlap qaldyq,

Kim túsinýshi edi biraq ta darany birden?!

.

Shýaǵyn tóksin baýyryń,

Jurtyń araıyn,

Basyńa qonǵan baq shyǵar bul kún, aǵaıyn!

Álem qol soǵyp jatqanda, Dımash, jaryǵym,

Mańdaı terińdi jyrymmen súrtip alaıyn!

Maqpal Mysa

***

Dımash, alǵa!

Jaraısyń, Dımash, áıgili boldyń álemge, 
Talantty sendeı ánshi týmaǵan ár elde.
Qazaqtyń qandaı el ekendigin jurt bildi,
Dáleldediń SEN, dálelde, taǵy dálelde.
.
QAZAǴYM, alǵa, DIMASHYM, samǵa qyrandaı,
Sharyqta sharla, óneriń barda mynańdaı!
Talaıdy tańdaı qaqtyrǵan seniń - daýysyń, 
Jeti qat tipti aspandy tesip shyǵardaı.
.
Jyljı bersinshi jetistigińniń kerýeni,
Aqtaldy mine ata-anańnyń da eńbegi.
"Qudaıbergendeı" tegińiz tegin emes-aý,
Ózińdeı uldy qazaqqa Qudaı bergeni.
.
Ámire atań - álemdi ánmen terbese,
Sol salǵan joldy jalǵashy sen de, endeshe.
Sáttilik saǵan serik bolsynshy, Dımashjan,
Janymyz bizdiń alyp-ushady "sen" dese!
.
Estisek, shirkin, "saıystan taǵy jeńdi" - dep,
Jas tolyp kózge ketedi júrek eljirep.
Qazaqtyń sendeı talantty uly turǵanda,
Kók týym kókte turady jelsiz jelbirep!
.
Saıat Ábenov

***

Sen qazaqtyń baıraǵyn jelbirettiń

Áýen qalqyp barady ǵaryshtarǵa,
Ǵaryshtarmen haqym joq qaýyshpaýǵa.
Qanattaryn sabalap aıdyn kólde,
«Aqqýyńsyz» múmkin be taǵy ushpaýǵa?!

Máskeý jaıdy qushaǵyn, Qyrym jaıdy,
Qulyn daýsyń Londonda shyryldaıdy.
Oza shapqan báıgeden Qulager-ul,
Arda únińnen jan-tánim shymyrlaıdy.

Sharlap ketti shartarap bulbul únge,
Jer qozǵadyń ,,Adaıdyń" kúmbirine.
,,Umytylmas kúnińe" máńgi aınalsyn,
Qamshy basqyn sen daǵy dúldúlińe.

Móp-móldir tunyǵady aq tańda áýen,
Sulý sazdyń sen daǵy aqtańgeri eń.
Qazaǵymnyń baǵysyń mańdaıdaǵy,
Jaryq bolsyn juldyzyń atqan beren.

Tańdandyryp talaıdyń sal-qyranyn,
Aspanynda Shanhaıdyń shalqydy ániń.
Mıllıonnyń júregin otqa oraǵan,
,,Adajıoń" jahanǵa saldy uranyn.

Mende elittim qaıteıin, eljirettiń,
Syıqyr emes, pende edik et-júrektiń.
Shyrqyraǵan qulynym, shyn qýandym,
Sen qazaqtyń baıraǵyn jelbirettiń.

Ásel Ospan

***

 Dúldúl

Shyrqaı bilgen shynaıy san ǵasyrdaı,

Alty qyrdan qazaq pa, ándi asyrmaı…

Álem bitken ánshige jalt qarady,

Ámireniń ádemi jalǵasyndaı!

 .

Qubylyssyń erekshe, bilem múlde,

Atyńdy aıtyp ár qytaı júrer kúnde.

Aspan asty elinde asqaq turdyń,

Aspan astyn shýlatyp jiberdiń de…

 .

Án shyrqaǵan dala men taýda máńgi.

Qazaq álem nazaryn aýdarar-dy.

Qyrdyń úni qytaıdy qyryp salyp,

Dala daýsy dúnıeni jaýlap aldy!

 .

Ashylatyn aldynan baǵyn bilip,

Keldi qytaı eline nar ul kirip.

Mıllıard qarjy shyn daryn shyǵarmaı-aq,

Mıllıardty aldy ǵoı baǵyndyryp…

 .

Aqyndarym arnaýda jyryn ǵajap,

Esi ketti estip el únińdi az-aq.

Dúldúlimen jaýlasa buryn babam,

Bulbulymen jaýlady búgin Qazaq!

 .

Eń úzdikke artady el de aýyryn,

Kórkem uldyń shaıqaǵan kór daýylyn!..

Japyryldy únińdi jahan tyńdap,

Jalǵyz óziń Jeńdiń ǵoı, Sen baýyrym!

 .

Bıik rýh bar anań, ákeńde de,

Ultym dese, uǵynbas qaper nege?

Shekesi tar sheneýnik qazaq bilmes,

Qazaq tilin úırettiń jat elge de!..

 .

Qalyń qaýym jibermeı qarsy alǵanda,

Tańdaılary oıyldy tamsanǵanda.

Qytaılardy qybyrsyz turmaıtuǵyn,

Qımyldatpaı qoıdyń ǵoı án salǵanda!..

 .

Ósken ultpyz órlegen  óleńmenen,

O, Qudiret!

Osy ǵoı óner degen!

Áýenińmen áýelep jylap turdy,

Mıllıon qazaq eline eleńdegen!

 .

 Dúldiúli sen báıgeniń dúbirlegen,

Qanshama arý jylady kúlimdegen…

Baılyq penen bıliktiń qoly jetpes,

Júrekterdi jaýladyń Únińmenen!

 .

Qalyń qytaı Dımash dep qaldy uranmen,

Shaqyrýda shartarap barlyǵy álden.

Uly dala ulany boldyń naǵyz –

Uly Qytaı qorǵanyn aldyń ánmen!

 .

Shyn daryndar shyǵady shyraıly elden,

Sypyryla qulady synaı kelgen.

Ániń ǵajap bolmaýy múmkin emes –

Seni óıtkeni Qazaqqa Qudaı bergen!

Qazybek  ISA

 ***

Daýsyńnan aınaldym Dımash

Dımash dosym qulaq as tilegime,

Álemge de tanyldyń mine, mine.

Ánderińdi tyńdap em, kishigirim

Óleń keldi judyryq júregime.

.

Ónerdiń esigine bilip kirseń,

Aralap bar álemdi júrip bilseń.

Qas bolǵan qysyq kózdi qytaılardyń,

 Tas bolǵan júrekterin jibittiń sen.

.

Kıeli sahnada óziń júrdiń,

Baqtyń bir kún qonatyn kezin bildiń.

Ánińdi tyńdap, sózin uqpasam da,

Daýsyńmen mýzykany sezindirdiń...

.

Tek tilerim kútpesin aldan qaıǵy,

Bilesiń, aqyldy adam aldanbaıdy.

Keı qazaq ókpeletse kóńilge alma,

Ózińde kórip júrsiń bolǵan jaıdy.

.

Al sen óz qazaǵyńdy bilesiń ǵoı,

Onsha-munsha ónerge tań qalmaıdy.

Qytaıyń bylaı tursyn, bar jas ánshi,

 Sendeı juldyz bolýdy armandaıdy...

.

Erekshe ánshi bop qaldyń el esinde,

Toqtamaı júz ónerdiń kemesinde.

Djekı Chanmen kezdesti degenińdi,

Estigende, jyladym senesiń be?

.

Taǵdyr jazǵan san túrli jol bar edi,

Bata, tilek adamǵa qorǵan edi.

Kózimnen kórer bolsań shattyǵymdy,

Qushaqtap alar ediń sonda meni...

.

Ózińdi jalǵyz Qudaı qoldap edi,

Bireýler Dımash degen sol ma dedi.

Meniń bulaı jazǵanym sol Djekı Chan,

Eń birinshi armanym bolǵan edi.

.

Qytaı qyzyn qulattyń dıdaryńmen,

Ary qaraı ónerdi súı janyńmen.

Armanyma sen jettiń qazaq baýyr,

Sonyń úshin shynaıy rızamyn men.

.

Aman bol ákeń úshin, anań úshin,

Basa ber, Djastınderden qalamysyń?!

Senimen túsken jalǵyz sýretim bar,

Kim bilgen sol sýrettiń baǵalysyn.

.

Júregińe óleń bop baılanaıyn,

Ataǵyń jete bersin aıǵa dáıim.

Kóńilime oı salǵan neshe túrli,

Dımash baýyrym daýsyńnan aınalaıyn.

.

Súıgen qulyn bir Qudaı qoldap óter,

.Kópteý maqtap jibersem olda beker.

Jasaı ber, aıtpaqshy bir ótinishim,

Djekı Chanǵa sálem aıt, sol da jeter...

.

Dımash jan tilegińnen aınalaıyn,

Án aıtqan júregińnen aınalaıyn,

Talantyńnan aınaldym, daýysyńnan,

Taǵdyr saǵan ý emes bal usynǵan...

Baqdáýlet Arystan

Jınaqtap, usynǵan: Maqpal Sembaı