Almaty oblysy qorǵanys isteri jónindegi departamentiniń jeke quramyna qurylymdy buzatyn ıdeıalardyń kirýine jol bermeý jáne aldyn alý sharalary túsindirildi. Taldyqorǵan garnızony áskerı polısıasy bóliminiń aǵa ofıseri ádilet maıory Erjan Madımarov destrýktıvti dinı uıymdarǵa tán erekshelikterdi atap ótip, jeke quramnyń adamdarmen aralasýda muqıat bolýlaryn surady. Tıym salynǵan uıymdarǵa qatysy bolǵan jaǵdaıda QR Qylmystyq Kodeksiniń 255, 256, 257, 259, 260 baptary boıynsha jaýapqa tartylatyndaryn erekshe eskertti. Onyń málimetinshe, osy kúnge deıin Almaty oblysy boıynsha áskerı qyzmet ótkeretin áskerı qyzmetshiler arasynda ekstremıstik, terorıstik uıymdarǵa qatysy bar adamdar anyqtalmaǵan.
– Sektalardan keletin qaýip-qater nashaqorlyqtan kem túspeıdi. Ǵalymdar sektalyq jınalys kezinde qannan bólinip shyǵatyn endorfın gormondary adam aǵzasyna esirtki jáne psıhotropty zattardyń áserimen birdeı bolatynyn dáleldegen, - dedi dáris barysynda ádilet maıory E.Madımarov.
Onyń aıtýynsha, adamnyń esirtkige ádettenýin adamnyń sekta ortasyna úırenýimen salystyrýǵa bolatyn kórinedi. Sanaǵa baqylaý júrgizý arqyly sekta kóshbasshylary ózderiniń izbasarlaryn tolyq baǵyndyrady. Mundaǵy basty qaǵıda – ornyn, ýaqytyn tabý jáne adamnyń psıhologıalyq jaǵdaıyna ene bilý.
Sektaǵa jańa kirgen adamnyń kózqarasy onda uzaǵyraq bolǵandarǵa qaraǵanda múldem bólek bolatyn kórinedi. Onyń uıymǵa tezirek úırenip, sińip ketýi úshin músheleri baryn salyp, ony barynsha qoldaýmen bolady. Mundaı qarym-qatynasqa zárý adam ózge qajettilikteri men tilekterinen birden bas tartyp, jańa ortaǵa tez beıimdele bastaıdy. Osylaısha otbasynyń ornyn sekta almastyrady.
Álem boıynsha sektalyq uıymdardyń sanyn dóp basyp aıtý qıyn, shamalap aıtsaq, birneshe myńnan asyp ta ketedi. Amerıkalyq áleýmettanýshylar óz elindegi sektanyń sanyn 3 myńnan asyp jyǵylatynyn, ondaǵy adam sany 11 mln-ǵa jetkenin aıtyp dabyl qaǵýda.
Ókinishtisi sol, Qazaqstanda da astyrtyn jumys júrgizip, qatarlaryn tolyqtyryp jatqan sektalyq uıymdar kóbeımese azaıar emes. Alańdatarlyǵy, olardyń quramyna kiretin 2 mln-ǵa jýyq adam 25 jasqa deıingi jastar ekeni anyqtaldy. Ásirese, úlken qalalarda dástúrli emes din ókilderi belsendi túrde jumys júrgizýde.
Olar adamdarǵa sanany baqylaý arqyly psıhologıalyq turǵydan áser etedi. Jubatý, kóńilin aýlaý, jyly sózder aıtý sıaqty jan tebirenterlik «ádister» kimdi bolsa da qarmaqqa ońaı ilindiredi. Ásirese, jastar jaǵy mundaıǵa sengish keledi. Al sektalar jastarǵa zárý, sondyqtan basymdyqty
solarǵa beredi. Nátıjesinde sana-sezimin sektaǵa bıletken jastar oqýyn, jumysyn, otbasyn tastap, «belgisizdiktiń» qurbanyna aınalady.
Dertpen kúreskennen góri onyń aldyn alǵan jón. Bul turǵydan arnaıy ortalyqtar buqara halyq úshin tyıym salynǵan uıymdardan keler qater týraly jadynamalar, qalta kitapshalaryn, anyqtama materıaldaryn shyǵaryp, taratqan jón.
Al áskerı qyzmetshilermen osy taqyrypta jıi leksıalar ótkizip, saýalnama júrgizip, arnaıy din mamandarymen kezdesý ótkizip otyrý abzal.
Ár azamattyń qyraǵylyq, saqtyq tanytýy, ár iske jaýapkershilikpen qaraýy elimizdiń beıbitshiligi men tynyshtyǵyn saqtaýda mańyzdy ról atqarady. Elimizde zań talaptaryn qatań saqtaýshylar úshin esh kedergi joq. Al qoǵamǵa iritki salyp, eldikti buzýǵa talpynǵandar qatań jazalanyp, tıisti jaýapkershilikke tartylatynyn eskergen jón.
