Shymkentte 30-ǵa jýyq kópqabatty turǵyn úı áli kúnge kógildir otynǵa qosylmaǵan. Sonyń saldarynan birqatar páter ıeleri qaýipti bolsa da gaz balondy qoldanyp júr. Betin aýlaq qylsyn, eger jazataıym oqys jaǵdaı bola qalǵan jaǵdaıda birneshe baspananyń kúli kókke ushýy múmkin. Sonda ne istemek kerek? Bir emes,  birneshe shańyraqqa tabıǵı gaz jetkizý qanshalyqty qıynǵa soǵyp tur. Bul týraly Qamshy.kz aqparat agenttigi Eýrazıa birinshi arnasynyń deregin negizge ala otyryp habarlaıdy.

Birneshe turǵyn úı 50-shi jyldary qoldanysqa berilgen. Sodan beri mundaǵylar gaz balondy jasyryp bolsa da, paıdalanady. Onyń qaýipti ekeni ras, árıne. Biraq, amal qansha. Elektr energıasyna qymbat aqsha tólegenshe, syǵymdalǵan gaz balonyn paıdalanǵan arzan olarǵa. Sondyqtan turǵyndar jetiskennen emes, jetpegennen osyndaı qadamǵa baryp otyrmyz deıdi. 

Gúlnara Ordabaeva qalanyń qaq ortasynda tursa da áli kúnge gaz balondy paıdalanyp júrgenin aıtady. Onyń úıi hákim Abaıdyń esimimen atalatyn negizgi kósheniń birinde ornalasqan. Biraq, sonda da kógildir otynǵa qol jetkize almaı keledi. 11 páterli eki qabatty turǵyn úıde kileń egde kisiler turady eken. Barlyǵynyń páterinde syǵymdalǵan gaz balony bar. Tipti, artyǵymen ákep qoıady eken. 

Gúlnara Ordabaeva, qala turǵyny: Qaýipti, árıne. Endi qaıtemiz? Gaz taýsylyp qalǵan kezde, tamaq istemeı otyramyz ba? Svet bolsa, qymbat.

Qalalyq tótenshe jaǵdaı departamenti mamandarynyń sózinshe, Shymkentte 30 shaqty kópqabatty turǵyn úı kógildir otynǵa qosylmaǵan. Turǵyndar as-aýqatty elektr peshimen daıyndaıdy. Al, kópshiligi kádimgi gaz balonyn paıdalanady. 

Seıdaly Qosalıev, qala turǵyny:  Bomba qushaqtap otyrǵan adam sekildi otyramyz. Allaǵa syıynyp, jarylyp ketpese eken dep. Ásirese, Tarazda jarylǵanda qatty qoryqtym. Endi Qudaı saqtasyn dep otyrmyz. 

Kópqabatty úılerge gaz kirgizý ákimdik úshin ońaıǵa túspesi belgili. Óıtkeni, barlyq baspananyń zańdy jeke qojaıyny bar. Ári úı jekemenshik bolǵandyqtan qazynadan qarjy qarastyrý da zańsyz. Tek, sol nysanǵa deıin ǵana gaz qubyryn tartyp bere alady. Qalǵany páter ıesiniń esebinen júrgizilýi tıis. Sol úshin qala bıligi jańǵyrtý baǵdarlamasyn qolǵa alyp otyr.

Nurlan Jamankózov, qalalyq energetıka jáne komýnaldyq sharýashylyq basqarmasy basshysynyń orynbasary: Tek qana, bir baǵdarlama bar. Jańǵyrtý boıynsha, qaladaǵy 4 aýdan ákimdigi jumys istep jatyr. Sol baǵdarlama arqyly memleketten qarjy bólinip, nesıe arqyly úılerge gaz kirgizýge bolady.

Degenmen, aq jaǵalylar bul máseleni tezdetip sheshpese bolmaıdy degen jurt, eki jaqty aıtysyp- tartysyp júrgende aıaq asty bálege ushyrap qalýymyz da múmkin dep qorqyp otyr. Sol úshin qaýiptiń aldyn alǵan abzal deıdi olar.

Usynǵan: Farıza Jomartqyzy