Lázzat Tanysbaı «Qazaqstan» RTRK» AQ Basqarma tóraıymy bolyp taǵaıyndaldy. Ujymǵa jańa basshyny Aqparat jáne qoǵamdyq damý mınıstri Dáýren Abaev tanystyrdy dep habarlaıdy Qamshy.kz aqparat agenttigi.

"Búgin «QAZAQSTAN» RTRK» AQ ujymyna jańa basshy – Lázzat Tanysbaıdy tanystyrdym.
Lázzat Muratqyzy belgili jýrnalıs, televızıa salasynyń bilikti mamany ári tabysty top-menedjer ekenin ózderińiz de jaqsy bilesizder.
L. Tanysbaı qazirgi ýaqytqa deıin qolǵa alynǵan irgeli sharalardy odan ári jalǵastyryp, korporasıany jańa deńgeıge kóteredi dep senemin.
Al, buǵan deıin tóraǵalyq qyzmetti abyroıly atqarǵan Erlan Tynymbaıuly Qarınge alǵys aıtyp, jańa qyzmetinde tabys tileımin!" dep jazdy mınıstr Facebook-tegi paraqshasynda. 

Lázzat Tanysbaı

Almaty halyqaralyq jýrnalısıka ınstıtýtyn bitirgen.

Eńbek jolyn 1993 jyly Qazaqstan Respýblıkalyq Teleradıokorporasıasynda redaktor qyzmetinen bastady, odan keıin reporter jáne telejúrgizýshi qyzmetin atqardy. «Habar» Agenttiginiń irgetasy qalanǵan kúnnen bastap (1996 j.- 2002 jylǵa deıin) jańalyqtar qyzmetiniń redaktory – júrgizýshisi, atqarýshy prodúseri bolyp eńbek etti.

2002 jyly memlekettik qyzmetke aýysty. Qazaqstan Respýblıkasy Prezıdent Ákimshiliginiń Baspasóz qyzmetinde bas sarapshy, sektor meńgerýshisi, bas ınspektor qyzmetterin atqardy.

2005 jyldyń qyrkúıek aıynan bastap 2008 jylǵa deıin – Qazaqstan Respýblıkasy Mádenıet, aqparat jáne sport mınıstrligi, Aqparat jáne muraǵat komıteti tóraǵasynyń orynbasary boldy.

2008 jyldyń qazanynan bastap 2011 jyldyń qarashasyna deıin – «Qazaqstan» Respýblıkalyq Teleradıokorporasıasy» AQ Basqarma tóraǵasynyń birinshi orynbasary qyzmetin atqardy. 2011 jyldyń 4-shi qarashasynan bastap – QR Aqparat jáne baılanys vıse-mınıstri.

2012 jyldyń aqpanynda «Astana q. teledıdary» JSHS-niń Bas dırektory bolyp taǵaıyndaldy.

Eńbek jolynda túrli marapattarǵa ıe bolǵan - Qazaqstan Jýrnalıser Odaǵy syılyǵynyń laýreaty, «Qurmet» ordeniniń ıegeri (2010), Qazaqstannyń eńbek sińirgen qaıratkeri (2015). Eki balanyń anasy. «Naǵyz baqyt - ózgelerdi baqytty etý» degen qaǵıdany ustanady.

Usynǵan: Gúlim Jaqan