Nur-Sultan qalasynyń ákimi Baqyt Sultanovtyń nazaryna!

Bul maqalaǵa arqaý bolǵan másele – Nur-Sultannyń laı, balshyq kósheleri...

Elordamyzdyń balshyqqa batqan kósheleri turǵyndardy ábden sharshatty. Qamshy.kz aqparat agenttiginiń redaksıasyna habarlasqan «Vena oramy» (JK «Venskıı kvartal» - red.) turǵyn úı kesheniniń bir top turǵyndary ózderiniń jaǵdaılaryn aıtyp, redaksıaǵa  shaǵymdandy. Olardyń máselelerin estigende Elordanyń ataýy Nur-Sultan bolyp ózgergenine rasynda da yńǵaısyzdanyp ketedi ekensiń.

QR Tuńǵysh Prezıdentiniń esimin ıelengen qala turǵyndarynyń zaryn estigen kópshilik jaǵalaryn ustady. Teledıdardan kórip júrgen ertegidegideı tap-taza, áp-ádemi Astanamyzdyń jaǵdaıy múlde biz oılaǵandaı emes eken.

«Vena oramy» turǵyn úı kesheniniń turǵyndarynyń aıtýynsha, balshyqqa batqan kóshede júrip-turý múmkin emes, tipti, qajet kezde jedel járdem qyzmetin paıdalaný da muń bolyp otyr eken.

«Bir kúni 80 jastaǵy anamnyń jaǵdaıy kúrt nasharlap, jedel járdem shaqyrtqan bolatynbyz. Turǵyn úıge baratyn jol joq, sondyqtan ol ýaqytyly kelmedi. tipti «Vena oramy» turǵyn úı keshenine kirip-shyǵatyn da jol joq», - dep shaǵymdandy turǵyndardyń biri.

Taǵy bir másele – uıaly baılanys.  Bul turǵyn úı kesheninde uıaly baılanys qyzmeti de durys istemeıdi eken.

Aıta keteıik, «Vena oramy» - EHRO qalashyǵyna jaqyn mańda ornalasqan jáne 2018 jyly ǵana qoldanysqa berilgen jańa turǵyn úı kesheni.

Osy oraıda atalmysh keshenniń turǵyndary qala ákimdigine óz shaǵymdaryn aıtýda.

«Qurmetti Nur-Sultan qalasynyń ákimdigi, Elbasynyń esimin ıelengen qalanyń atyna osynshalyqty kir keltirýge bola ma?! Durys jol joq. Oqýshylardyń mektepte baryp-kelýi – úlken muń. Jedel járdemniń kelýi qıyn. Ásirese, aıaǵy aýyr kelinshekterdi aýrýhanaǵa jetkizý kezinde «terbetilgen» jedel járdem kóligine otyrý qanshalyqty aýyr ári qaýipti ekendigi barshamyzǵa málim. Múmkin ákimdik qyzmetkerleri astanamyzdy tek ózderiniń kreslosynda terbetilip otyrǵandaı sezine ma eken? Joq. Olaı emes!

Ákimdik qyzmetkerleri astananyń balama jaǵdaıyn kórgisi kelse, JK «Venskıı kvartal» jaqqa bir kelip ketsin. Turǵyndar qalaǵa shyǵar kezde kólikteri laı bolyp shyǵyp, úlken kóshelerdi lastaıdy eken. Bizdegi laı, balshyqtan  qalanyń tazalyǵy eki ese zıan shegip otyr», - dep dabyl qaǵady turǵyndar.

Astanamyzǵa qydyryp kelgen sheteldikter qalanyń osyndaı sıqyn kórse uıat, kúlkige qalamyz.

«Búkil álemdi tań qaldyryp, EXPO 2017 ótkizgenimiz eshkimniń esinen shyǵa qoıǵan joq. Sol kórme ortalyǵyna jaqyn ornalasqan «Vena oramy» turǵyn úı kesheninen páter jaldaǵan birneshe sheteldik 2-3 aıdan keıin páterlerin tastap basqa jaqqa kóship ketti. Ondaı mysaldar óte kóp. Astananyń basqa aýdandaryna kóshse, ol jaqtaǵy ınfraqurylym Vena oramyndaǵydaı emes. Myqty. Jalpy sheteldikter Vena oramynyń ınfraqurylymyn kórgende ne oılaıdy eken? "Myna qazaqtar astanasynyń atyn Tuńǵysh Prezıdentteriniń esimimen «Nur-Sultan» dep ózgertti. Tuńǵysh Prezıdentterin keremet maqtaıdy. Al, onyń atyndaǵy qalanyń sıqy mynaý" dep kúletin shyǵar... Netken uıat...» - deıdi «Vena oramy» turǵyn úı kesheniniń turǵyndary.

Olar óz shaǵymdaryn jetkizip, qala ákimdigine turǵyn úı keshenindegi jaǵdaıdy óz kózimen kórip ketýge ótinish aıtyp otyr.

Usynǵan: Nazerke Labıhan