Osydan birneshe jyl buryn bastamasy kóterilip, jan-jaqty ıdeıalarmen jandana túsken mýzeı ashý isin kópshilik jambyldyq temirjolshylar qoldaǵan edi. Jambyl Júk tasymaly bólimshesi dırektory Berik Aqshalovtyń bas bolyp, qoldaý bildirýiniń arqasynda mýzeıdi jasaqtaý, jabdyqtaý jumystary júıelenip, jaqynda jańa mýzeı kópshilikke esigin aıqara ashty.

Bólimshe ǵımaratynda ótken saltanatty jıynǵa jergilikti temir jol bólimsheleri basshylarynan bólek sala ardagerleri, Astanadaǵy ortalyq apparat ókilderi, kórshiles Túrkistan oblysynan at aryltyp jetken qonaqtar da qatysty. Atap aıtsaq, «QTJ» UK»AQ tehnıkalyq saıasat jónindegi atqarýshy dırektory Beıbit Ibraev, «QTJ» UK»AQ – Júk tasymaly fılıalynyń kásipodaq keńesiniń tóraǵasy Ermek Tólegenov, buǵan deıin Oral, Jambyl, Almaty jol bólimshelerin basqarǵan Dáýletbaı Esimbekov, 1993-2007 jyldary aralyǵynda Jambyl jol bólimshesin Qurmetti temirjolshy Saǵymbek Aqshalov, Shymkent Jol bólimshesi ardagerler keńesiniń tóraǵasy Nurǵalı Nurtaev, Jambyl oblystyq ardagerler keńesiniń tóraǵasy Erkinbek Soltybaev syndy azamattar quttyqtaý sóz sóılep, izgi tilekterin bildirdi.   

Jambyl jol bólimshesiniń mýzeıi ashylǵan bul datany tarıhı kún desek te artyqtyq etpes. Óıtkeni buǵan deıin mundaı mýzeı Jambylda bolmaǵan eken. Ashylý saltanatynyń alǵashqy sóz tizginin alǵan Jambyl Júk tasymaly bólimshesiniń dırektory Berik Aqshalov bul kún barsha jambyldyq temirjolshylar úshin úlken mereke ekenin aıtyp ótti.

– Biz búgin bólimshedegi ardagerler keńesiniń tóraǵasy Saǵymbek Aqshalov pen bólimshe kásipodaq uıymynyń tóraǵasy Juman Sámenovtiń bastamasymen, osy kisilerdiń uıytqy bolýymen qolǵa alynǵan tirliktiń jemisin kórip otyrmyz. Bul rette mýzeıdiń ashylý saltanatyna deıin atqarylǵan kól-kósir eńbek úshin osy istiń bel ortasynda, basy-qasynda júrgen azamattarǵa sheksiz alǵysymdy bildiremin. Mýzeı ishindegi májilis zalynyń rekonstrýksıalyq jumystaryna da kóp kúsh, materıal jumsaldy. Al mýzeı jádigerleri de ońaıshylyqpen jınala qoımady. Biz munda temir jolǵa qatysty barlyq mamandyqty, onyń atqarǵan jumysyn kórsetýge, qamtýǵa barynsha tyrystyq. Kóne de qundy dúnıelerdi taptyq. Uly Otan soǵysyna qatysqan temirjolshylardyń da maıdandaǵy erlikterin kórsetýge, umyt qaldyrmaýǵa kúsh saldyq, – dedi B.Aqshalov.

Mýzeı syrtynda ótken saltanatty jıynnan soń  lenta qıylyp, qonaqtar men temirjolshylar jádigerlerdi tamashalady. Munda sonaý Túrksib magıstraliniń qurylysy kezinen saqtalǵan kóne zattar, sol kezde túsirilgen fotosýretter toptastyrylǵan.

Jalpy, mýzeıge kirgennen qos qaptaldap naǵyz temirjoldyń zattary, qundy dúnıeleri men fotosýretteri, qujattary ornalastyrylsa, tór jaǵynda jambyldyq qurmetti temirjolshylar men óńirdiń basshylyǵynda bolǵan azamattardyń fotosýretteri ilinipti. Al túpki tórde, jaryqpen bezendirilgen Qazaqstan temir jolynyń kartasy qoıylǵan. Bir sózben aıtqanda mundaǵy qural-saıman, óndiristik materıal, fotosýret, apparat, tósbelgi, tý túrindegi jádigerlerdiń bári sonaý Túrksib kezeńinen osy kúnge deıingi óńirlik temirjolshylar ómirinen, salanyń tynys-tirshiligine habar berip tur.

Mýzeı ishin búge-shigesine deıin aralap, qyzyqtap kórgen soń jıylǵan jurt mádenı sharalarǵa da beıimdelip qaıta jaraqtandyrylǵan májilis zalynda konserttik baǵdarlamany tamashalady.

Baqyt Jalǵas