Jastar jyly aıasynda M.H.Dýlatı atyndaǵy TarMÝ-de «Stýdenttik kóktem» atty aımaqtyq baıqaý-festıvali ótti.

Elimizdiń ońtústik aımaǵynda ornalasqan joǵary oqý oryndary stýdentteriniń shyǵarmashylyǵyna qoldaý kórsetý maqsatynda uıymdastyrylǵan sharaǵa Qoja Ahmet Iasaýı atyndaǵy Halyqaralyq qazaq-túrik ýnıversıteti, M.Áýezov atyndaǵy Ońtústik Qazaqstan memlekettik ýnıversıteti, M.Saparbaev atyndaǵy Ońtústik Qazaqstan gýmanıtarlyq ınstıtýty, Halyqaralyq gýmanıtarlyq-tehnıkalyq ýnıversıteti, Ońtústik Qazaqstan memlekettik pedagogıkalyq ýnıversıteti, Qorqyt ata atyndaǵy Qyzylorda memlekettik ýnıversıteti men óńirdegi 3 joǵary oqý oryndarynyń stýdentteri qatysyp, baqtaryn synady.

Taraz aspanyn eki kún boıy dúbirge bólegen baıqaýda olar estradalyq vokal, halyqtyq horeografıa, zamanaýı horeografıa jáne kúıshilik óner janrlary boıynsha ónerlerin ortaǵa saldy. Baıqaýǵa belgili óner maıtalmandary qazylyq etip, talapty  jastardyń shyǵarmashylyǵyna baǵasyn berdi.

Baıqaýdyń estradalyq vokal bóliminde jas ánshiler jandy daýysta 2 án oryndaýy tıis boldy. Qazaqtyń ataqty kúıshi-kompozıtory Ábdimomyn Jeldibaev tóraǵalyq etken qazylar alqasynyń músheleri ánshilerdiń sahnada ózin-ózi ustaýy, ártistik qabileti, ándi oryndaý tehnıkasy, oryndaý sheberligi, sahnalyq kıimi, tańdalǵan repertýary oryndaýshynyń dıapazonyna sáıkes kelýi men mýzykaǵa ilesýine qatań syn kózben qarap, ádil baǵasyn berip otyrdy. Sondaı-aq olardiń kemshin tustaryn aıtyp, tabıǵatyna keletin týyndylardy tańdaý qajettigin de eskertip otyrýdy umytpady. Al halyqtyq horeografıa bóliminde bıshiler qazaq jáne ózge ulttyń bıin bıleýge mindetteldi. Al óz kezeginde ádil qazylar olar oryndaǵan bıdiń qoıylymy, oryndaý sheberlikteri, sınhrondy oryndaýy men sahnalyq kıimderine basa nazar aýdardy.

Sondaı-aq zamanaýı horeografıa bóliminde úmitker toptar 2 bı bılep, ónerlerin ortaǵa saldy.

Al, kúıshilik óner bólimi jeke oryndaýshy jáne qazaq ulttyq aspaptar ansámblderiniń saıysy boıynsha órbip, olar 2 kúıden oryndady. Munda da olardyń oryndaý sheberlikteri men sahnalyq kıimderi eskerildi.

Osylaısha, ońtústik aımaqtaǵy joǵary oqý oryndarynyń ónerli stýdentteri baıqaýdyń gala-konsertinde óner kórsetýge múmkindik aldy.

Festıváldiń kelesi kúni gala konsert joǵary deńgeıde uıymdastyryldy. Saltanatty sharada oblys ákiminiń orynbasary Sulýshash Qurmanbekova  baıqaýdyń mańyzdylyǵyna toqtalyp, barsha qatysýshylarǵa jyly lebizin bildirdi.

Munan soń sóz tizgindegen M.H.Dýlatı atyndaǵy TarMÝ rektory Mahmetǵalı Sarybekov atalǵan oqý ornynyń uıymdastyrýymen eki jylda bir ret uıymdastyrylatyn «Stýdenttik kóktem-2019» festıvali bıyl erekshe formatta ótip jatqanyn tilge tıek etip, Jastar jylyna arnalyp otyrǵandyǵyn jetkizdi.

Sonymen baıqaý nátıjesine kelsek, «Kúı óneri» janry boıynsha bas júldeni M.Áýezov atyndaǵy Ońtústik Qazaqstan memlekettik ýnıversıtetiniń «Altaı Uran» toby ıelendi.

Al «Kúı óneri» jeke oryndaýshy janry boıynsha Qorqyt ata atyndaǵy QMÝ stýdenti Nurbol Qýanyshev jeńimpaz atandy.  Sonymen qatar «Halyq horeografıasy» janry boıynsha «Bı Sultan» tobynyń bıshileri eshkimge des bermedi. Sondaı-aq «Zamanaýı horeografıa» janry boıynsha «Tarsu.kz» bı toby İ oryndy ıelendi.

Baqyt Jalǵas