2018 jylǵy aldyn ala derekter boıynsha Jambyl oblysynyń jalpy óńirlik óniminiń ósimi 1417,5 mıllıard teńgeni, ıaǵnı 3,7 paıyzdy qurap, bul respýblıka óńirleri arasyndaǵy 8-inshi kórsetkish bolyp otyr. Bul jóninde Jambyl oblysy ákiminiń birinshi orynbasary Bekbolat Orynbekov Óńirlik komýnıkasıalar qyzmetiniń alańynda ótken brıfıńte baıandady.
Aldymen ekonomıka salasyndaǵy kórsetkishterge toqtalǵan Bekbolat Serikbekuly respýblıkanyń jalpy óńirlik ónimindegi oblystyń jalpy óńirlik óniminiń úles salmaǵy 2,4 paıyzdy quraǵanyn aıtyp ótti.
– Jalpy óńirlik ónimniń qurylymynda ónerkásip úlesi – 17,9, aýyl sharýashylyǵy – 10,2, qurylys – 8, saýda – 9,9, kólik – 18,2, baılanys – 0,7, jyljymaıtyn múlikpen jasalatyn operasıalar jáne bilim salasynyń 7,5 paıyz salymdarynyń ósimi baıqalady.
Al 2019 jyldyń qańtar-sáýir aılarynyń qorytyndysy boıynsha ónerkásip óniminiń naqty kólem ındeksi 102,1 paıyzdy qurap, 154 095,8 mıllıon teńgeniń ónimi óndirildi, – dedi B.Orynbekov.
Qurylys kólemi 17 477,7 mıllıon teńgeni qurap, 1,2 paıyzǵa artypty. Bul byltyrǵy jyldan beri óńirde turǵyn úı qurylysynyń qarqyn alǵanymen baılanysty bolsa kerek. Máselen, bıylǵy qańtar-sáýir aılarynda 125 myń sharshy metr turǵyn úı paıdalanýǵa berilipti, bul 2018 jyldyń tıisti esepti kezeńimen salystyrǵanda 104,8 paıyzdy qurap, salada alǵa jyljý baıqalyp otyr.
Sondaı-aq, halyqtyń orta eseppen jan basyna shaqqandaǵy ataýly aqshalaı tabystary 2018 jyldyń 4 toqsanynda 65056 teńgeni qurap, 2017 jyldyń tıisti kezeńimen salystyrǵanda ataýly kóriniste 11,1 paıyzǵa, naqty – 5,6 paıyzǵa artypty. Bul da kóńil kónshiterlik kórsetkish.
Ortasha aılyq ataýly jalaqy da 2019 jyldyń alǵashqy toqsanynda 112,3 myń teńgeni qurap, ataýly kóriniste 9,9 paıyzǵa, naqty kóriniste 4,6 paıyzǵa ósken eken.
Kirissiz búdjettiń qalyptaspaıtyny belgili. Sondyqtan atqarýshy bıliktiń basymdyq beretin bir baǵyty – búdjet kiristeriniń josparyn barynsha oryndaý. 2019 jyldyń 1 mamyryna oblys búdjetiniń kiristeri 76 mıllıard 294,1 mıllıon teńge somasynda, ıaǵnı 106,2 paıyzǵa qamtamasyz etilip otyr. Bul rette menshikti kiristerdiń jospary kútkendegiden kóbirek oryndalypty. Aıtalyq, kiristiń bul túrin osy septi kezeńde 15 mıllıard 896,7 mıllıon teńgege oryndaımyz dep bekinse, naqtysynda kiris 20 mıllıard 319,9 mıllıon teńgege asyp-jyǵylyp, 127,8 paıyzǵa oryndalǵan. Esesine búdjetke 4 mıllıard 423,1 mıllıon teńge jospardan artyǵymen túsip otyr. Al kórsetkishti byltyrǵy jyldyń osy esepti merzimimen salystyrsaq ósim 116,4 paıyzdy qurapty.
Baqyt Jalǵas
