«Jasyl» energetıkany qarqyndy damytýǵa bet burǵan elimizde balamaly qýat kózderinen energıa jınaý jolǵa qoıylyp keledi. Bul rette, bolashaqtyń tehnologıasyn óz ıgiligine jaratýda Jambyl oblysynyń respýblıka kóleminde kósh bastap kele jatqany qýantady. Barlyq turǵydan tıimdi júıege kóship, ózge óńirler arasynda kósh bastaýǵa Qordaıdaǵy jel, Jýaly aýdanyndaǵy kún jáne T. Rysqulov aýdanyndaǵy sý elektr stansıalarynyń iske qosylýy úlken septigin tıgizdi. Al, jýyrda atalǵan balamaly kózderden qýat óndirý keshenderiniń qatary taǵy bir nysan – Jańatas jel elektr stansıasymen tolyqpaq.
Ásilinde, Sarysýda jel elektr stansıasyn salý týraly usynystar aıtylyp kele jatqanyna birshama ýaqyt bolǵan. Osylaısha, býyrqanǵanda jolyndaǵyny jaıpap ótýge qaýqary jetetin jelin paıdaǵa jaratý týraly bul pikirler nazarǵa alynyp, birer ýaqyt buryn qurylys jumystary bastalyp ta ketti.
Túrkistan aýyldyq okrýginde ornalasatyn atalmysh stansıa 100 MVt elektr energıasyn óndiredi dep josparlanyp otyr. Nysannyń qurylysyn júrgizý úshin jobany usynýshy – «Jańatas jel elektrostansıasy» JSHS-i elektr qýatyn bólý syzbasyn ázirlep, «KEGOK» kompanıasynyń kelsimin alǵan. Bas merdiger retinde anyqtalǵan Qytaı Halyq Respýblıkasynyń «China Power International Holding» kompanıasy stansıa qurylysyn keler jyldyń aqpanynda aıaqtaýdy josparlap otyr. Sondaı-aq, olar qurylysqa qajetti zattardy jergilikti taýar óndirýshilerden alatynyn aıtady.
Osylaısha, sarysýlyqtar jyl on eki aı tynymsyz soǵatyn «Aqqyrqa» men «Arystandy Qarabas» jelin qajetke jaratyp, el ıgiligine paıdalanbaq. Muny «joqtan bar jasap», tabıǵattyń qudyretin adamnyń qajettiligine ıkemdeýdiń keremet úlgisi dep bilsek bolady.
Árıne, jel elektr stansasynyń elimizdegi «jasyl» ekonomıkanyń damýyna ǵana emes, aýdannyń ósip-órkendeýine de tıgizer úlesi mol. Ásirese, qurylys barysynda jáne nysan áske qosylǵan kezinde jańa jumys oryndarynyń ashylýy jergilikti halyqty qýantary sózsiz.
Keıingi jyldary Jambyl oblysy barlyq salalar boıynsha aldyńǵy qatardan kórinýde. Endigi kezekte balamaly energıa kózin kádege jaratý baǵytynda da oń ózgeristerge jol ashylýda. Bul óz kezeginde aımaqtyń damýyna tyń serpin beretindigi daýsyz.
Baqyt Jalǵas
