Jastar jyly aıasynda «Qazfosfat» jaýapkershiligi shekteýli seriktestigi óndiris salasynda júrgen ozyq oıly, ónertapqyshtyq qasıeti bar jasy 35-ke deıingi azamattar arasynda «Bolashaq bizdiń qolymyzda» atty konkýrs ótkizdi. Jalpy, seriktestikte 6 223 adam eńbek etse, onyń 2 167-si 18-35 aralyǵyndaǵy jastar. Konkýrstyń alǵashqy kezeńinde osy kompanıada jumys isteıtin 70-ke jýyq jas konkýrstyń birinshi kezeńinde ózderiniń 59 kreatıvti jobalaryn usynyp, sonyń ishinde 35-i aqtyq synǵa ótken bolatyn. Al fınalǵa ótkender óz jobalaryn arnaıy qurylǵan komısıa aldynda qorǵady. Atalǵan komısıanyń jáne «Qazfosfat» JSHS-niń basqarma tóraǵasy Maqsutbek Esenov bul Jastar jylyna arnalǵan aýqymdy joba ekenin aıta kele, aqtyq aınalymǵa shyqqandarǵa sáttilik tiledi.
– Jobanyń maqsaty – kompanıada eńbek etetin jastardyń ózin-ózi damytýyna jaǵdaı jasaý. Kóshbasshylyq qabiletin arttyryp, iskerlik belsendiligin, qarym-qabiletin, jobalaý daǵdylaryn qalyptastyrý jáne shyǵarmashylyq ujymda ádis-tásilderin jetildirip, ıdeıalaryn qanattandyrý. Budan bólek jastardyń ıdeıasy arqyly qoǵamdaǵy nemese kompanıadaǵy tehnıkalyq, ekonomıkalyq, áleýmettik sekildi san túrli saladaǵy ózekti máselelerdi sheshý. Osy konkýrstyń arqasynda jastar tek qyzmetker bolyp qana qoımaı, ózekti máselelerdi sheshýde basshylyq qabiletke ıe ekenin de kórsete alatynyna senimdimin, – deıdi komısıa tóraǵasynyń orynbasary, «Qazfosfat» JSHS bas dırektory Muqash Eskendirov.
Ózderiniń kreatıvti ıdeıalary men utymdy usynystaryn kóptiń talqysyna salǵan ónertapqyshtyń biri – «Qazfosfat» JSHS Mıneraldy tyńaıtqysh zaýyty bas energetıginiń orynbasary Abzal Qonysbaev. Ol óz jobasynda óndiris ornyndaǵy júk kótergish mehanızmderdegi paıdalanylatyn symdardy alyp tastap, onyń ornyna qabyldaǵysh jáne jibergish sıgnaldardy engizý arqyly mehanızmdi púltpen basqarý usynylǵanyn aıtady.
– Konkýrsqa jastar ekologıalyq, áleýmettik, tehnıkalyq, elektrlik, mehanıkalyq jáne óndiristik salalar boıynsha óz jobalaryn ákelip qorǵap jatyr. Negizinen meniń jobam symsyz basqarý dep atalady. Bul júk kótergish zattardy púlt arqyly alystan basqarý. Atalǵan jańa qurylǵy alǵash Mıneraldy tyńaıtqysh zaýytynda qoldanylyp, qazir óńirdegi óndiris oryndarynyń seksennen astam núktelerinde paıdalanýǵa engizilip úlgerdi. Osy qurylǵy arqyly 600-900 kelili tartatyn júkti ashyq vagondarǵa artýǵa bolady. Bul óz kezeginde eńbek ónimdiligin artyratyny anyq, – deıdi Abzal Qambaruly.
Konkýrs nátıjesinde birinshi oryndy Jańa Jambyl fosfor zaýyty óndiris bóliminiń ınjeneri Roman Syrsov jeńip alyp, 300 myń teńge júlde qorymen marapattaldy. Al ekinshi oryn Mıneraldy tyńaıtqysh zaýytynyń laboranty Vera Dalıngerge buıyryp, 200 myń teńge qarjylaı syılyqqa ıe boldy. «Qarataý» taý-ken óndirisiniń baqylaý-ólsheý qurylǵylary jáne avtomatıka bóliminiń basshysy Nurgeldi Sattarhanov úshinshi orynǵa laıyq dep tanylyp, 100 myń teńge ıemdendi. Budan bólek Jańa Jambyl fosfor zaýytynyń laboranty Aqtolqyn Dáýletova «Úzdik áleýmettik joba» jáne «Qazfosfat» JSHS Taraz ofısiniń baǵdarlamashy-keńesshisi Ánel Erjanova «Áleýmettik mańyzy bar joba» atalymdary boıynsha marapattalyp, olarǵa da 100 myń teńgeden berildi.
Baqyt Jalǵas
