Jambyl oblysynda jastar saıasatyn júzege asyrýǵa volonterlar da óz úlesin qosyp keledi. Olar qarttar úıi, jalǵyzbasty qarttardyń jáne múmkindigi shekteýli jandardyń sharýashylyǵyna udaıy kómektesip otyrady. Sondaı-aq, respýblıkalyq, oblystyq qoǵamdyq-saıası aýqymdaǵy sharalarǵa belsendi aralasýda.
Bıyldan bastap volonterlardyń áleýeti qaıyrymdylyqqa, muqtaj otbasylaryna naqtyly kómek kórsetýge baǵyttalǵan. Oblysta 2 myńǵa jýyq eriktiler derekqory jasalyp, bul jumystardy júıelendirý maqsatynda oblys ákimdiginiń Qaýlysymen «Qamqor» volonterlyq-qaıyrymdylyq jobasyn iske asyrý jónindegi Jospar bekitilgen bolatyn. Osy jobanyń sheńberinde oblystaǵy az qamtylǵan, turmysy tómen, kómekke muqtaj otbasylardyń áleýmettik jaǵdaıyn anyqtap, saraptaý jumystaryn júrgizý, qajettilikterine qaraı júıeli túrde jan-jaqty qoldaý kórsetý, áleýmettenýine yqpal etý qaralǵanyn erekshe atap ótýge bolady.
Jambyl oblysynda 1800 volonter bar. Olardyń 550-i Taraz qalasynda bolsa, 1250-i aýdandarda. Josparǵa sáıkes osy volonterlar arnaıy ázirlengen áleýmettik saýalnama toltyrý maqsatynda oblystaǵy 250 myńnan astam otbasyn aralaýdy josparlaǵan. Naqtylaı ketetin bolsaq, Taraz qalasyndaǵy 89 299 jáne aýdandarda 165 232 otbasy. Jalpy 218 736 otbasyn aralap, 77 385 otbasyna saýalnama toltyrylǵan. Endi toltyrylǵan osy saýalnamalar arnaıy ázirlengen derekqorǵa engizilýde. Qorytyndysy boıynsha anyqtalǵan muqtajdyqtar saralana otyryp, ár aýdan, qala, oblystyq áleýmettik karta ázirlenetin bolady.
Joba aıasynda, sondaı-aq Taraz qalasynda 3 qaıyrymdylyq dúken ashyldy. Barlyq qajetti jabdyqtarmen qamtamasyz etilgen bul dúkender arqyly jyl basynan beri 752 otbasyna 3 tonnaǵa jýyq kıim-keshek úlestirildi. Budan bólek, halyq kóp shoǵyrlanatyn 5 saýda ornynda arnaıy jáshik ornatyldy. Sonymen qatar, joba aıasynda volonterlardyń yqpal etýimen oblys boıynsha 609 otbasyna 3,2 mıllıon teńgege azyq-túlik túrinde kómek kórsetildi. Osylaısha, oblys volonterlary qaıyrymdylyq sharalaryn iske asyrý baǵytynda biraz sharýanyń basyn qaıyrdy. Olardyń kómegin, sondaı-aq jalǵyzbasty qarttar men múmkindigi shekteýli jandar da sezinýde. Sebebi, sharýashylyǵyna udaıy kómektesip otyrady.
Dýlat Aıtbaı
