Elbasynyń Jarlyǵymen jarıalanǵan bıylǵy «Jastar jyly» Qazaqstannyń barlyq óńirlerinde qyzý qoldaý taýyp, ıgi bastamalarǵa ulasyp jatqany belgili.
Qazaqstan Respýblıkasy Úkimetiniń Qaýlysymen «Jastar jylyna» oraı arnaıy Jol kartasy bekitilgen. Sonyń negizinde barlyq ýákiletti organdarmen talqylana otyryp, 2019-2020 jyldarǵa arnalǵan óńirlik Jol kartasy qabyldandy.
Jol kartasynda jastardy eńbekpen, sapaly bilimmen qamtý, jas kásipkerlerdi qoldaý, bilikti mamandar daıarlaý, jastardyń bos ýaqytyn tıimdi úılestirý, volonterlyqty damytý jáne basqa da mańyzdy sharalar qarastyrylǵan.
Jambyl oblysy ákimdiginiń jastar saıasaty máseleleri basqarmasy usynǵan málimetke súıensek, oblysta tıisti múddeli organdar arqyly jastar saıasatyn júzege asyrýǵa 2018 jyly 574,6 mıllıon teńge bólinse, aǵymdaǵy jyly 892 mıllıon teńge qaraldy. Onyń ishinde oblys ákimdiginiń jastar saıasaty máseleleri basqarmasyna – 174,7 mıllıon teńge, aýdandar men Taraz qalasyna − 476,9, Qazaqstan halqy Assambleıasyna − 26,6, mádenıet, arhıvter jáne qujattama basqarmasyna − 204,9, dene shynyqtyrý jáne sport basqarmasyna − 1,0, bilim basqarmasyna − 2,7, týrızm basqarmasyna − 5,2 mıllıon teńge qarastyrylǵan.
Memlekettik áleýmettik tapsyrys sheńberinde 60 mıllıon teńgege 31 baǵytta áleýmettik mańyzy bar jobalar qarjylandyryldy. Ótken jyly 26 baǵytta qolǵa alynǵan jobalarǵa 64,7 mıllıon teńge qaralǵan bolatyn.
«Josparlanǵan sharalar barlyq aýdandardy tolyq qamtýǵa baǵdarlanǵan ári jergilikti ákimdikterdiń josparlary soǵan sáıkestendirilgen. Al bul baǵytta iske asqan is-sharalar ýaqytyly, ıaǵnı belgilengen merzimderine sáıkes júzege asyrylýda», − deıdi oblys ákimdiginiń jastar saıasaty máseleleri basqarmasynyń basshysy Mádı Máten.
Jastar saıasatyna qatysty jyl boıy basqa da ýákiletti organdar tarapynan ótetin sharalar jelisi ázirlengen. Oǵan 300-ge jýyq shara enip otyr. Jalpy, jastar arasyndaǵy qoǵamdyq-saıası ahýal turaqty. Óńir jastarynyń memlekettik jastar saıasatyna qanaǵattaný deńgeıi ótken jyly 77,8 paıyzdy kórsetti.
Dýlat Aıtbaı
