Áńgime Mataevta turǵan joq. Áńgime – Almaty degen ádemi ataýdy orystildi óz qazaqtarymyzdyń sińire almaýynda tur. Kez kelgen qazaqtyqty qazaq balasynyń qabyldaı almaýynda tur! Konstıtýsıanyń jańa jobasyn qabyldaǵan kezde «Qazaqstannyń astanasy – Almaty qalasy bolyp tabylady» dep jazylyp ketipti-mis. Oǵan «Elbasy da mán bermepti, otbasyndaǵy kúńkil-shúńkil áńgimede osyǵan qatty ókingen» kórinedi... Endi oryssha «Alma-Ata», qazaqsha «Almaty» dep ataı bereıik te degen usynys tastapty. Ne degen danyshpandyq, ne degen kóregen usynys. Bizdiń qazaq qansha táýelsiz, egemen el boldyq dep ózin aldarqatqanymen eshqandaı da táýelsiz, eshqandaı da egemen el emes eken. Quldyq sana qazaqtyń mıyna, qanyna, júregine, bolmys-bitimine ábden sińip qalǵan eken. Aqyry ózgertetin bolsaq, Almatyny – «Nýr Alma-Ata» dep nege bir-aq ózgertpeımiz?! Tipti tólqujatymyzǵa «qazaq» dep jazyp, nesine áýre bolyp júrmiz. Nesine táýelsiz elmiz dep tepsingende jerdi aıyryp jibere jazdap, kúshenip júrmiz bosqa?! Odan da aqyry úsh orystyń odaǵy – aqorys, saryorys, qaraorysqa nege kóshe salmaımyz? Aqorys – belarýs, saryorys – kádimgi orys, qaraorys – biz, qazaqtar. Túrimiz – qara, tilimiz – orys. Tamasha emes pe?! Otanym desem, keń-baıtaq. Orysym túser oıyma! Qudaıbergen KORCHAGIN "Aıqyn"