SHQO Altaı aýdany Kúmisbulaq óńirinde QMDB Óskemen aımaǵy ókildiginiń uıymdastyrýymen «Jastar jylyna» oraı «Dala semınary» bir aptalyq jobasy júrip jatyr. Bul týraly Qamshy.kz aqparat agenttigi Shyǵys Qazaqstan oblystyq «Halıfa Altaı» meshitiniń baspasóz qyzmetine silteme jasap habarlaıdy. 

Elimizdiń barlyq oblysynan kelgen 80-ge tarta jas taza aýada tabıǵat aıasynda bas qosyp, másele talqylap, sporttan, ónerden saıysqa túsip, balyq aýlap, sýǵa júzip ár kúndi kóńildi ótkizýde.  

"Jastardyń otanshyldyq sezimin oıatý, ulttyq qundylyqtardy dáripteýde bul sharanyń orny erekshe. Bolashaqta bul sharany ákimdikter, basqa da ókildikter qolǵa alyp óristetse quba-qup bolar edi", - deıdi, sharaǵa qatysýshylar.  

Semınardyń «Tanym, taǵylym» kúndigi aıasynda óskemendik aqyn, jýrnalıs Murathan Kenjehanuly, jas aqyn Dáýletberdi Jekeı, «Egemen Qazaqstan» gazetiniń tilshisi, jýrnalıs Azamat Qasymdar «Dala semınaryna» qatysýshy jastarmen kezdesip qaıtty. Aqyndar jyr oqyp, jastarǵa ómirlik tájirıbelerinen aıtyp berdi.  

Sonymen qatar sharaǵa qatysýshy jastar arasynda «Qazaq kúresinen» saıys, arqan tartý qatarly ulttyq oıyndar oınatylyp, jeńimpazdar marapat, kýbok, syılyqtarmen marapattaldy.  

"Bul joba tyń bastama bolǵandyqtan Jastar is-sharalarǵa asa belsendi qatysyp jatyr. Olarǵa barlyq qolaıly jaǵdaı jasaldy. Jastarǵa sporttan arnaýly jattyqtyrýshy shaqyryldy. Sonymen qatar oblysqa tanymal ónerpazdar kelip konsert qoıdy", - dedi, Shyǵys Qazaqstan oblystyq «Halıfa Altaı» meshitiniń birinshi naıb ımamy Dáýlet Qabıdoldın. 

Búgin joba aıasyndaǵy «Altaı tarıhy» etnografıalyq saıahat bastaldy.