Respýblıkalyq «Taza Qazaqstan» aksıasy aıasynda Besqaraǵaı aýdanynda chellendj ótti. Chelendjde aýdan basshylyǵynyń ókilderi, belgili sportshylar, jastar, depýtattar, jergilikti turǵyndar jańadan salynyp jatqan Ortalyq saıabaqta 6 túrli aǵash kóshetterin otyrǵyzdy. 

Jas sportshy Nurym Nurbek chellendj ótedi degendi estigen sátten bastap oǵan qatysýdy uıǵarǵanyn, sebebi óziniń basty ustanymy baýyrlaryna, dostaryna úlgi bolý ekenin aıtady.

Ata-anamyz «Bir tal kesseń, on tal ek», «Atadan mal qalǵansha, tal qalsyn» degen halqymyzdyń ulaǵatty sózin árdaıym esimizge salyp, bizdi tabıǵatqa qurmetpen qaraýǵa tárbıelegen. Barshańyzdy aksıaǵa belsene atsalysýǵa shaqyramyn, - deıdi Nurym Nurbek. Ortalyq saıabaqqa aǵash otyrǵyzýǵa kelgenderdiń arasynda Izmaılovtar jas otbasy da bar.

— Memleket basshysynyń bastamasymen ótip jatqan «Taza Qazaqstan» ekologıalyq aksıasynan tys qalmaýdy jón kórip, senbilikterge qatysyp jatyrmyz. Otbasymyzben kelip, jańa saıabaqqa jas aǵash otyrǵyzdyq. Biz otyrǵyzǵan aǵash otbasymyzben birge ósetin bolady. Bolashaqta osynda demalýǵa kelgende, urpaqtarymyzǵa kórsetip, olardy da tabıǵatty súıýge tárbıelesek deımiz, - deıdi Alsý Izmaılova.

Aksıa sońynda ákim bastaǵan aýdan turǵyndary chellendjdi Abaı aýdanyna joldady.