Birneshe táýlik boıy qutqarýshylar Shyǵys Qazaqstannyń Altaı aýdanynda tilsiz jaýmen kúres júrgizip, qazir órtti aýyzdyqtaýǵa múmkindik týdy.

Óńir basshysynyń aıtýynsha, eldi mekenderge qaýip joq, halyqty evakýasıalaý josparlanbaǵan. Aýdany 700 ga bolatyn órtti sóndirýge jergilikti TJ bólimsheleriniń, JAO jáne ormanshylyqtardyń barlyq kúshteri jumyldyryldy. Bul shamamen 200 adam jáne 24 tehnıka. Jetý qıyn taýly jerlerde qutqarýshylarǵa aýadan sý jiberýdi júzege asyratyn MI-8 tikushaqtary kómekke keldi. Qazir óńir basshysy Sennoe aýylyna ushyp ketti. Bul órtke eń jaqyn eldi meken, onda táýlik boıy jedel shtab qurylyp, qutqarýshylardyń is-qımyldary úılestirildi.

Aıta keteıik, qurǵaq shóptiń janýy Shyǵys Qazaqstannyń basqa aýdandarynda da tirkelgen. Máselen, qazir Óskemen qalasynyń mańyndaǵy Kamennyı karer kentinde órtti aýyzdyqtaý úshin 400-den astam adam jáne 41 birlik tehnıka jumys istep jatyr. Órt aýmaǵy shamamen 35 gektardy qurap otyr. Órt sóndirýshilerden basqa, ulttyq gvardıanyń 200 jaýyngeri, sondaı-aq aımaqtyń iri kásiporyndarynyń órt sóndirý bólimderi belsene qatysýda. Polısıa qyzmetkerleri patrúldeýdi júzege asyrýda.

Jappaı órt Kúrshim aýdanynda, Marqakól kóliniń mańynda da tirkeldi. Munda tilsiz jaýdy toqtatyp, onyń eldi mekenderge taralýyna jol berilmedi. Halyq pen múlikke qaýip joq, jaǵdaı turaqty baqylaýda.