Elimizdiń kıeli jerlerin nasıhattap, óskeleń urpaqqa ólkeniń baı tarıhyn, táýelsizdiktiń jetistikterin tanystyrý maqsatynda birqatar ıgi bastama qolǵa alynǵany belgili. Osy oraıda Semeıdegi fızıka-matematıka baǵytyndaǵy Nazarbaev zıatkerlik mektebiniń oqýshylary Aqtóbe qalasynda bolyp qaıtty dep habarlaıdy Qamshy.kz aqparat agenttigi.  

«Rýhanı jańǵyrý» baǵdarlamasy aıasyndaǵy sapar barysynda balalar Aqtóbedegi tarıhı-mádenı, áleýmettik-ekonomıkalyq mańyzy bar nysandardy aralap, jaqyn tanysty. Áýeli olar Aqtóbedeı sáýletti de kórkem shahardyń kórikti jerlerin kózben kórip, qala týraly, jergilikti jerden shyqqan aty alashqa málim belgili tulǵalar týraly tyń aqparattarǵa qanyqty.  

Qaladaǵy Uly Otan soǵysynyń ardagerlerine arnalǵan «Álıa» aleıasyna at basyn baılaǵan semeılik oqýshylar mergen qyzdyń ómiri men maıdandaǵy erligi jóninde bilip, eskertkishke gúl shoqtaryn qoıyp, batyr rýhyna taǵzym etti.   

    Sonymen qosa «Shyǵarmashylyq saraıy», «Tenıs alańy», «Muz aıdyny» keshenderin, qalalyq atshabardy, «Jekpe-jek» sport saraıyn, «Atameken» bıznes ortalyǵyn jáne basqa da nysandardy aralap, ózderiniń zertteý jumystaryna qajetti mol aqparat aldy. 

– Ekspedısıa óte qyzyqty boldy. Ásirese, erekshe este qalǵany Qobda aýdanyna barǵan saparymyz. Bul aýdanda esimi elge tanys uly adamdar týǵan. Solardyń biri qazaqtyń batyr qyzy Álıa Moldaǵulova. Sapar aıasynda biz Álıa apamyzdyń týǵan «Álıa» patrıottyq tárbıe berý ortalyǵyna bardyq. Kóptegen tarıhı derekpen tanystyq, – deıdi Nazarbaev zıatkerlik mektebiniń oqýshysy Arýjan Sarbıeva. 

Budan bólek semeılik oqýshylar Aqtóbe olysyndaǵy qundy tarıhı nysan – «Abat Baıtaq» kesenesinde, «Qyz-áýlıe» qorymynda, Jırenqopa jerindegi Qobylandynyń  tarıhı-memorıaldyq kesheninde, osydan eki jyl buryn paıdalanýǵa berilgen «Anaǵa taǵzym» ortalyǵynda bolyp, jazýshy T.Ahtanov atyndaǵy teatrda «Mahabbat jaǵalaýy» atty psıhologıalyq dramany tamashalady.