Shyǵys Qazaqstan oblysynyń Altaı aýdanyna qarasty «Kógildir buǵaz» demalys bazasynda «Jastar – Qazaqstan damýynyń flagmany» atty respýblıkalyq forým ótti dep jazady Qamshy.kz aqparat agenttigi. 

Bul is-shara «Rýhanı jańǵyrý» baǵdarlamasy aıasynda Halyqaralyq eńbek uıymynyń 100 jyldyq mereıtoıyna jáne elimizdegi Jastar jylyna arnaldy.  

– Forým «Jastar – Qazaqstan damýynyń flagmany» dep tekten-tek atalǵan joq. Óıtkeni Elbasy Nursultan Nazarbaev árdaıym elimizdiń bolashaǵy jastardyń qolynda ekenin jıi aıtady. Forýmda pikirlerińizdi ashyq aıtyp, ózekti máselelerdi talqylańyzdar, kásipodaq jumysyn jetildirýge qatysty usynys-tilekterińizdi bildirińizder, – dedi forýmnyń ashylýynda sóz sóılegen oblystyq ishki saıasat basqarmasynyń basshysy Irına Smıt.  

Aıta keteıik, forýmnyń maqsaty – jastardyń kásibı jáne tulǵa retinde qalyptasýyna jaǵdaı jasap, olardyń áleýetin áleýmettik problemalardy anyqtaýǵa, sheshýge qoldaný, salalyq kásipodaq múshelerin jan-jaqty qoldaý, olardyń múddelerin qorǵaý.  

Forým aıasynda ótken dóńgelek ústelde jastar kásipodaq qozǵalysyn damytý týraly oılaryn ortaǵa saldy. Odan basqa taqyrypqa oraı semınar-trenıng ótti. Sporttyq saıystar, vıktorınalyq oıyndar, fleshmob syndy kóptegen kóńil kóterý sharasy uıymdastyryldy. 

«Kógildir buǵazdaǵy» basqosýǵa elimizdiń túkpir-túkpirinen 150-ge tarta qatysýshy jınaldy. Olardyń ishinde salalyq kásipodaqtardyń oblystyq fılıaldarynyń ókilderi men elimizdiń barlyq óńirinen kásipodaq kóshbasshylary bar. Forým aıasynda mádenıet, sport, týrızm jáne aqparat qyzmetkerleriniń salalyq kásipodaǵy men Mádenıet jáne sport mınıstrliginiń týrızm ındýstrıasy komıteti arasynda yntymaqtastyq memorandýmyna qol qoıyldy.