Shyǵys Qazaqstan oblysynyń ákimi Berdibek Saparbaev - bir qaraǵan adamǵa ultjandy (ultshyl emes) azamat bolyp kórinýi ǵajap emes. Bul elge ákim bolyp kelgende alǵashqy jumys saparyn danyshpan Abaı jerinen bastaǵanynyn umyta qoıǵamyz joq. «Mynaý tilsiz, dinsiz, teksiz bıliktiń ishinde de ımanjúzdi bir jan bar eken ǵoı» dep el aqsaqaldary basynda qaýqyldasyp-aq qalysqan bolatyn. Biraq, keıde «osy bizde aqsaqal deıtindeı jandar qaldy ma eken áýeli», degen jaman oıǵa da eriksiz qalady ekensiń.
Biraq, Shyǵys óńirindegi bul «qaýqyldasýdyń» aıaǵy kóp uzamaı, «jershildik», «rýshyldyq» boıaý ala bastaǵanda, álgi el aqsaqaldary ishin jıyp ala qoıǵan. Qasıetti Shyǵysta el basqaratyndaı bir adamnyń joq ekenin dáleldeý úshin SHQO ákimi B.Saparbaev kóp uzamaı, ózi týyp-ósken ońtústikten shyqqan et jaqyndary men sybaılastarynyń shubyrǵan qalyń toby birden «jańa basshylar» atanyp, qara qońyzdaı qaptap berdi dersiz. Sonda deımin-aý, Abaıdaı danyshpandy, Muhtar Áýezovtaı qazaq ádebıetiniń klassıgin jáne Keshirimhan Boztaevtaı saıası tulǵany, júzdegen, myńdaǵan dara tulǵalardy ómirge ákelgen qasıetti Shyǵys jeri endi el tizginin ustaıtyndaı bir azamatty dúnıege ákelmegen be dep kúıinedi ekensiń. B.Saparbaevtyń jazylmas, em qonbas dertiniń eń bastysy – osy «jershildik», «rýshyldyq» ekenin Shyǵys óńiriniń turǵyndary tym kesh bilip, sandaryn soǵyp qalǵan bolatyn. Iá, buryn bilgende de, qarapaıym halyqtyń qolynan ne keler dersiz. Bir ǵana adamǵa quldyq uratyn eldegi saıası júıege esi durys adam qalaı qarsy shyqsyn?
Iá, bul dert – Semeıdeı oblys ortalyǵynan aırylyp qalǵan qalyń elge indet bolyp tıgen. Nebir qolynan is keletin, bilikti de bilimdi, sarabdal saıasatker azamattar Berdibek Saparbaevtyń qaHaryna ushyrap, aı men kúnniń amanynda oryndarynan aırylyp, tentirep, tezek terip ketken.
BUL - Shyǵys Qazaqstan oblysynyń ákimi B.Saparbaevtyń birinshi kemshiligi. Endi onyń ekinshi kemshiligine toqtalaıyq.
Osy Shyǵys Qazaqstan oblysy Aıagóz aýdany «Tańsyq» aýylynyń túlegi, elimizdegi eń aýqattylardyń qataryna jatatyn Toqtarhan Qojaǵapanov degen «pysyqtyń» qalaı ǵana osy kelimsek ákimge jaǵyp qalǵanyn, aıagózdikter túsinbeı dal. «Ákimge jaqpaı emeı, nemene», búkil Aıagóz, Semeı, Qazaqstan, Túrik dúnıesi elderi osy Qojaǵapanovtyń «Tańsyq» aýylyn bir kezde bólimshe basqarǵan, marqum ákesi Juman Qojaqapanov esimimen atatýǵa bar kúshin salyp, jantalasyp júrgeninen jurtshylyq jaqsy habardar.
Basqalaryn aıtpaǵannyń ózinde, búkil Shyǵys Qazaqstan oblysy turǵyndary bul ádiletsizdikke qarsy oryndarynan óre túregelgende, oblys ákimi Berdibek Saparbaevtyń selt etpegeni eldi qatty tańqaldyrdy. «Bul netken beton-bet basshy» desti olar jaǵalaryn ustap.
Sonda deımiz-aý, ana qaltasy qalyń T.Qojaǵapanov myna B.Saparbaevtan bastap, barlyq ákim-qaralardyń aýzyn maılap jibergen-aý, áıtpese, oǵan ne bolypty qasıetti Qozy men Baıan jerin qaıdaǵy bir kelimsektiń esimimen atap jiberýshi aıagózdik máslıhattyń sheshimine qarsy kelmeı, miz baqpaı únsiz otyryp qalǵany elge túsiniksiz bolyp qalýda.
SHQO ákimi B.Saparbaevtyń -barsha ıisi Túrik jurtynyń ortaq asyl murasy sanalatyn, 2,5 myń jyldyq tarıhy bar, ǵashyqtyq sımvoly - «Qozy-Kórpesh-Baıansulý» kesenesi turǵan jerdi qaıdaǵy bir ferma meńgerýshisi, marqum Juman Qojaǵapanovtyń esimimen ataýdy qoldaǵan syńaı tantýy - bizdi eriksiz osyndaı oılarǵa jetelelegen. Aıagóz óńiriniń aýzy dýal aqsaqaldary:
-E, myna jemqorlyq dert tutastaı memlketti jaýlap alǵanda, oblys ákimi B.Saparbaev ta aýyz, keńirdek joq dep kim aıtty?- desip, jerge qaraǵan. Olardy jerge qaratqan – ákimniń T.Qojaǵapanovty qoldaǵan syńaı tanytýy edi. Osy ákimge eldiń «Qozy men Baıan» jriniń atyn ózgertýge baılanysty aryzdanǵandaryna da kóp boldy. Al, B.Saparbaev: «biriń - ólip, biriń - qal» degen adamsha, búginge deıin sol syzdanyp, jarylardaı bolyp, sazaryp otyr.
Mine, Shyǵys Qazaqstan oblysynyń ákimi Berdibek Saparbaevtyń eń basty eki kemshiligi degende, bizdiń aıtarymyz osy, aǵaıyn...
J.KÓKBÓRİ,
22.05.2013 jyl
Pikir qaldyrý