Qazaqstan Respýblıkasynyń Ulttyq kitaphanasynda Halyqaralyq TÚRKSOI uıymynyń bastamasymen jaryq kórgen «Úsh arys» kitap-albomynyń tusaýkeseri jáne İlıas Jansúgirovtyń týǵanyna 125 jyl tolýyna arnalǵan ádebı kesh ótti.

Shara aıasynda Ulttyq kitaphananyń qorynan İlıas Jansúgirovtiń ómiri men shyǵarmashylyǵyna arnalǵan «Halyq ómiriniń qaharman jyrshysy» atty kitap kórmesi de uıymdastyryldy

İs-sharany QR Ulttyq kitaphanasynyń ǵylymı hatshysy Bolat Júnisbekov ashyp, Halyqaralyq TÚRKSOI uıymynyń Qazaqstandaǵy ókili Asqar Turǵanbaev júrgizip otyrdy. TÚRKSOI tapsyrysymen kitapty jaryqqa shyǵarǵan «Central Asia Production» kompanıasynyń dırektory Berik Barysbekov álbomnyń daıyndalýy týraly baıandap, sóziniń sońynda osy iske tikeleı atsalysqan birneshe sýretshige halyqaralyq uıymnyń marapatyn tapsyrdy.

Qazaqstannyń Eńbek Eri, Halyq jazýshysy Oljas Súleımenov pen mádenıettanýshy-ǵalym, memleket jáne qoǵam qaıratkeri Murat Áýezov «Úsh arys» kitap-albomynyń tusaýyn kesip, mereıtoılyq sharaǵa qatysty oı-tolǵamdarymen bólisti. İlıas Jansúgirovtiń uly Saıat Jansúgirov ákesi týraly estelikterin áńgimelese, QR UǴA M.O.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov «Úsh arys» kitap-albomynyń erekshelikterine toqtalyp, quttyqtaýlaryn jetkizdi.

Kesh sońynda dástúrli ánshi Erlan Tóleýtaı, J. Asfendıarov atyndaǵy Qazaq Ulttyq medısına ýnıversıtetiniń  oqytýshysy Tóleýbek Zaısanbaev  pen stýdentteri M.Biláshov, A.Mamedov jáne L.Mıshralar ánnen shashý shashty. Keshke Sáken Seıfýllınniń týystary,aqyn-jazýshylar, otandyq zıaly qaýym ókilderi, BAQ ókilderi túrkitildes halyqtardyń dıasporalary jáne oqyrmandar qatysty.

«Úsh arys» álbomy qazaq ádebıetiniń «Úsh arysy», «Úsh báıteregi» atanǵan, úsheýi de bir jylda (1894) jaryq dúnıege kelip, bir jylda (1938) stalındik repressıa qurbany bolǵan Sáken Seıfýllın, İlıas Jansúgirov jáne Beıimbet Maılınniń ádebı muralaryna arnalǵan. Bul jobanyń maqsaty -  ádebı týyndyny qylqalam sheberiniń kózimen taný, kórnekti aqyn-jazýshylardyń ádebı shyǵarmalaryn kórkemsýret, keskindeme óneri arqyly tanytý, sondaı-aq, olar ómir súrgen kezeńdegi tarıhı týyndylar men zamanaýı eńbekterdi bir álbomǵa toptastyrý. Jınaqqa ótken ǵasyrdaǵy jáne qazirgi zamanǵy belgili otandyq qylqalam sheberleriniń atalǵan  aqyn-jazýshylardyń ádebı shyǵarmalaryn oqı otyryp dúnıege ákelgen kórkemsýret týyndylary engizilgen. «Úsh arys» jınaǵy – Sáken Seıfýllın, İlıas Jansúgirov jáne Beıimbet Maılınniń 125 jyldyq mereıtoıyna daıyndaǵan Halyqaralyq TÚRKSOI  uıymynyń arnaıy syıy.

Álbom Halyqaralyq TÚRKSOI  uıymynyń tapsyrysymen «Central Asia Production» kompanıasy tarapynan qazaq jáne orys tilderinde Germanıada basyldy. Muraǵattardy izdeý, arhıv, mýzeı materıaldaryn saralaý, tarıhı kórkemsýretterdi jańǵyrtý jáne aýdarma jumystaryn atalǵan kompanıa iske asyrdy.

«Túrki áleminiń IýNESKO-sy» degen atpen tanylǵan Halyqaralyq túrki mádenıetiniń uıymy (TÚRKSOI) 25 jyldan astam ýaqyt boıy túrki áleminiń mádenı murasyn halyqaralyq deńgeıde nasıhattaý, saqtaý jáne zertteý jumysyn belsendi túrde atqaryp keledi. Halyqaralyq uıym jyl saıyn túrki áleminiń mádenıeti men óneriniń damýyna qomaqty úles qosqan  kórnekti  mádenıet qaıratkerleriniń mereıtoılaryna oraı ataýly jyl jarıalap, mádenı-shyǵarmashylyq sharalar (konsertter, kórmeler, qoıylymdar, ǵylymı-praktıkalyq konferensıalar jáne t.b.) uıymdastyrý arqyly olardyń atyn dúnıejúzilik qaýymdastyqqa tanytýda.

Ortalyǵy Almaty qalasynda ornalasqan «Central Asia Production» kompanıasy  ımıjdik basylym salasyndaǵy otandyq úzdik kompanıalardyń biri. Kompanıa buǵan deıin de Halyqaralyq TÚRKSOI  uıymymen birigip birneshe iri jobalardy iske asyrǵan. Ótken jylǵy  Shyńǵys Aıtmatovtyń 90 jyldyq mereıtoıyna oraı shyǵarylǵan «Aımatovty oqyǵanda» atty kórkemsýretter jınaǵy álemniń túkpir-túkpirindegi ónersúıer qaýymnan  óte  joǵary baǵa aldy.

Jaqynda ǵana osy kompanıa basyp shyǵarǵan «Uly Dala tarıhy» kitaby 2019 jylǵy «Evropada shyqqan eń sapaly kitap» ataǵyna ıe bolyp, konkýrsqa qatysqan 100 kitaptyń ishinen Card Couture Award 2019 syılyǵyn jeńip aldy. QR Tuńǵysh Prezıdenti qorynyń tapsyrysymen Germanıada basylǵan bul kitapqa QR Tuńǵysh Prezıdenti-Elbasy Nursultan Nazarbaevtyń «Tarıh tolqynynda» kitaby negiz bolǵan.