Elbasynyń «100 naqty qadam» Ult josparynda et klasterin damytýǵa aıryqsha kóńil bólingenin el jaqsy biledi. Ásirese Ult kóshbasshysy et eksportyn damytýdy myqtap tapsyrdy. Sonyń arqasynda Jambyl oblysy ótken jyly qozy etin eksporttaý boıynsha respýblıka kóleminde kósh bastaǵan bolatyn. Árıne et eksportyn óristetý úshin mal bordaqylaý alańdary men qasaphanalardyń atqarar róli orasan. Bul oraıda Áýlıeata jerinde jańa et baǵytyndaǵy nysandar kún sanap kóbeıýde, dep jazady Qamshy.kz aqparat agenttigi. Máselen eki jylǵa jýyq ýaqyt Qordaı aýylynda tabysty jumys istep jatqan «Pervomaıskıe delıkatesy» jaýapkershiligi shekteýli seriktestigine qarasty qasaphananyń áleýeti jyldan jylǵa artyp keledi. Tolyqtaı zamanaýı jáne ozyq tehnologıalarmen jabdyqtalǵan mal soıý alańynda iri qara men usaq mal soıý jumystary kúndelikti júrgizilýde. Bul jerde soıylǵan mal tolyq sıkldi bastapqy óńdeýden ótip, tutynýshyǵa jóneltiledi. Aıta keterligi, zamanaýı tehnologıalardyń arqasynda qaldyqsyz óndiris ádisi qolǵa alynǵan. Iaǵnı, soıylǵan túliktiń ár bólshegi qajetke jaratylady. Al, bul iske qoıylǵan talaptar óte qatań. Qasaphana ishindegi minsiz tazalyqtan bastap, maldy baýyzdaý, ony bólshekteý syndy jumystar halyqaralyq standarttarǵa saı júrgizilýde. Sonymen qatar, Islam qaǵıdattary da saqtalady, ıaǵnı bul jerden shyqqan et «halal» standartyna saı keledi.

Negizinen Qazaqstan boıynsha ótkiziletin et, jaqynda shetelderge de eksporttala bastady. Seriktestik et eksporttaýshy kompanıalarmen kelisimshartqa otyryp, mal eti Bahreın, Birikken Arab Ámirlikteri syndy Azıa elderine jiberilýde.

Bul árıne qýanarlyq jaı. Esterińizde bolsa osydan birer jyl buryn Moıynqum aýdanyndaǵy Myńaral aýyldyq okrýgindegi balyq zaýyta dál osyndaı qaldyqsyz jumys jasaý júıesine kóshken bolatyn. Jáne kásiporyn óndirisin óristetip, ónimin jaqyn-alys shet memleketterge shyǵara bastaǵan edi. Nátıjesinde Moıynqum balyq zaýytyn Orta Azıadaǵy memleketterdiń deni estip, tirligine tánti bolǵan. Endi mine «Pervomaıskıe delıkatesy» jaýapkershiligi shekteýli seriktestigi de óndiriske ekpin qosyp otyr. Jáne ónimderi halal standartyna saı bolyp ǵana qoımaı, Birikken Arab Ámirlikterine deıin shyǵarylýda. Áýlıeatanyń et eksporttyq áleýeti ósti degen osy.