Qarttarǵa qaıyrymdylyq kómek berýshilerdiń sany jyldan-jylǵa kóbeıip, áleýmettik kómek alýshylar sany da arta túsýde. Osynyń ózi qoǵamymyzda qarttarǵa degen qamqorlyqtyń, olarǵa degen janashyrlyqtyń arta túskenin aıǵaqtaıdy.

Qarttardy qadirleý aılyǵy aıasynda, oblys boıynsha túrli sharalar ótkizilýde. Igi sharany alǵashqylar qatarynda “Nur Otan” partıasy Baızaq aýdandyq fılıalynda aýdandyq isker áıelder qaýymdastyǵynyń uıymdastyrýmen partıalyq “Ardagerlerdi ardaqtaıyq” jobasy aıasynda, urpaqtar sabaqtastyǵy men dıalog alańyn qamtamasyz etý maqsatynda aýdanymyzdaǵy eńbek ardagerlerimen kezdesý ótkizildi.

Atalmysh kezdesýde aǵa býyn ókilderine tıisti qurmetterin kórsetken uıymdastyrýshylar aýdannyń damýy men qurylýyna orasan zor eńbek sińirgen qarttarǵa alǵystaryn bildirdi. Bir mezet bolsa da kúndelikti kúıbeń tirlikten arylyp, bir-birimen shúıirkelese ketken qarttar máre-sáre bolysty. Aq dastarhan basynda keleli áńgimeler qozǵalyp, izgi tilekter aıtyldy.

Búginde ata jolyn jalǵap kele jatqan aqsaqal atalarymyz ben aq jaýlyqty ájelerimiz ekeni anyq. “Qarıa” degen sóz eldiń basy bolý, aqylyn aıtar dana bolý, el tórinde qurmetke bólený, as bergende nemereleriniń úlesin bóler qamqorshysy. Shańyraqtyń shattyǵyn saqtap, birligin bekem etýge aqylyn aıtar eli men jeriniń keńesshisi.

“Nur Otan” partıasy aýdandyq fılıaly tóraǵasynyń orynbasary Sholpan Baıtaqova, aýdandyq isker áıelder qaýymdastyǵynyń tóraıymy, jeke kásipker Sanıa Altaeva ózderiniń jastyq dáýirin keleshek úshin qıyn ómirdiń synyna salǵan, búgingi osy baqytty zamandy syılaǵan qarıalarǵa rızashylyqtaryn bildirdi. “Úlkendi syılaý, olarǵa qurmet kórsetý – ata-babadan kele jatqan saltymyz. Sizderdiń ómirlik tájirıbelerińiz ben aqyl-keńesterińiz, tálim-taǵylymdaryńyzdyń biz úshin orny bólek. Sebebi, árqaısyńyzdyń aýdannyń ósip-órkendeýine qosqan úlesterińiz ben eńbekterińiz eren. Talaı jasty tárbıelep, izbasarlar ósirdińizder. Búgin, eńbekterińizdiń zeınetin kórip otyrǵan shaqta da Sizder urpaqtaryńyzǵa ıgilik pen izgiliktiń, paıym-parasattyń úlgisin tanytýdan jalyqqan emessizder” - deı kele, ardagerlerdi, tyl eńbekkerlerin, aıaýly ájelerdi, jalpy, zeınetkerlerdi merekelerimen quttyqtap, uzaq ǵumyr tiledi.

Merekeniń munshalyqty mándi ótkenine qarttar da rıza boldy. Qazyna qarttardyń atynan sóz alǵan aýdandyq ardagerler keńesiniń tóraǵasy Kemelbek Bespaev shara uıymdastyrýshylaryna alǵys aıtyp, aq batasyn berdi.