«Nur Otan» partıasy Baızaq aýdandyq fılıalynyń uıymdastyrýymen kóshpeli qoǵamdyq qabyldaý ótti. Jıynda Jambyl oblystyq polısıa departamenti bastyǵynyń orynbasary Temirbek Orazymbetov, «Nur Otan» partıasy Jambyl oblystyq fılıaly qoǵamdyq qabyldaý bólmesiniń meńgerýshisi Úmit Ibraımova, aýdandyq polısıa bóliminiń bastyǵy, polısıa polkovnıgi Asylhan Zaýrbekov jáne partıanyń aýdandyq fılıaly tóraǵasynyń birinshi orynbasary Sholpan Baıtaqova azamattardy jeke qabyldap, muń-muqtajdaryn tyńdady.

Qabyldaýǵa birinshi bolyp kelgen Sarybaraq aýylynyń turǵyny Gúljamal Qýanysheva eki jyl buryn jergilikti polısıa bólimine urlanǵan malyna qatysty aryzdanǵanyn, alaıda osy másele boıynsha tergeý amaldary júrgizilip jatqany jaıly habarsyz ekendigin, kómek berýin ótindi. Temirbek Asylbekuly aryzben jeke tanysyp, azamatshanyń zań júzinde quqyqtaryn túsindirip, aldaǵy ýaqytta másele boıynsha ýájder tekserilip, baqylaýda ustaıtynyn jetkizdi.

Odan soń Dıhan aýyldyq okrýgine qarasty Aımantóbe aýylynyń turǵyny Qulanqadyr Jumabaev aýylǵa qarasty mal jaıylymyna arnalǵan jerdi zańsyz paıdalanylyp jatqandyǵyn, tórt jyldan beri memlekettik organdardyń tabaldyryǵyn tozdyryp, ádildik taba almaı júrgenin jetkizdi. Asylhan Ázimhanuly aryz ıesin muqıat tyńdap, jaýapty tulǵalarǵa jerge qatysty qujattardy tekserýdi, GPS ólsheý tehnologıasyn paıdalaný arqyly jer zań boıynsha kimge tıesili ekendigin jáne zerdeleý jumystaryn júrgizýdi tapsyrdy. Bul máselege qatysty aýdan ákimdigi jer qatynastary bóliminiń bastyǵy Nurlan Orazymbetov túsinikteme berdi.

Seńkibaı aýylynan kelgen Saýytbek Sársenov aǵymdaǵy jyldyń maýsym aıynda eki bas bıesiniń qoldy bolǵandyǵyn, qylmyskerler tıisti jazasyn alý qajettigin alǵa tartty. Polısıa polkovnıgi Asylhan Zaýrbekov jábirlenýshiniń shaǵymy nazarǵa alǵandyǵyn, qazirgi ýaqytta zerdeleý jumystary júrgizilip jatqandyǵyn baıan etti. Óz kezeginde Temirbek Asylbekuly aýylda tirkelgen mal urlyǵyna qatysty derekterdi tekserýdi tapsyryp, shaǵym boıynsha júrgizilip jatqan jumystardy óz baqylaýynda ustaıtyndyǵyn aıtty.

№3 Baızaq kolejiniń jumysshysy Abaı Mırmanov atalǵan oqý ordasynda tártipti qadaǵalaıtyn polısıa ınspektorynyń jumysyna baqylaýdy kúsheıtýin surandy. Bul másele boıynsha tıisti zerdeleý jumysy júrgiziletindigi aıtyldy.

Azamattardy mazalaǵan máselelerdi muqıat tyńdaǵan Temirbek Orazymbetov olardyń ótinishteri aıaqsyz qalmaıtyndyǵyn jáne aldaǵy ýaqytta mindetti túrde sheshimin tabatyndyǵyn málimdedi.