Halyqaralyq TURKSOY uıymy jáne Qurmanǵazy atyndaǵy Qazaq ulttyq konservatorıasynyń uıymdastyrýymen óner-bilim ordasynyń qurylǵanyna 75 jyl tolýyna arnalǵan mereıtoılyq sharalar aıasynda konservatorıanyń májilis zalynda belgili etnoorganolog-ǵalym, ónertanýshy Bolat Sarybaevtyń «Ǵalym murasy» atty kitaby men «Bolat Sarybaev jáne túrki álemindegi etnoaspaptaný máseleleri» atty jınaqtyń tusaýkeser rásimi ótti.

Eki jınaq ta Halyqaralyq TURKSOY uıymynyń demeýshiligimen Almaty qalasynda  jaryq kórgen. Jınaqtardy qurastyrýshylar – ónertaný ǵylymdarynyń kandıdaty, profesor Saıda Elemanova, ónertaný ǵylymdarynyń magıstri Sáýle Boranbaeva, ónertanýshy Fatıma Nurlybaeva.

Otandyq mýzykatanýshy ǵalymdar, zıaly qaýym ókilderi, ǵalymnyń jaqyn týystary, stýdentter men oqytýshylar qatysqan jıyndy Halyqaralyq TURKSOY uıymynyń Qazaqstandaǵy ókili Asqar Abdýalıuly Turǵanbaev ashyp, sóz kezegin Qurmanǵazy atyndaǵy QUK ǵylymı jumys jáne halyqaralyq yntymaqtastyq jónindegi prorektory, ónertaný kandıdaty  Ǵalıa Zaınaqulqyzy Begembetova aldy. Óz kezeginde sóz alǵan profesor Saıda Elemanova, profesor Bazarhan Qosbasarov, ó.ǵ.d., profesor Sáýle Óteǵalıevalar Bolat Sarybaevtyń qazaq aspaptaný ǵylymyna qosqan erekshe úlesin sóz etse, ǵalymnyń qaryndasy Dına Sarybaı uıymdastyrýshylarǵa alǵys sezimin jetkizdi. Sazsyrnaıshylar, jetigenshiler, qylqobyzshylar ansámblderi jáne sybyzǵy aspabynda oryndalǵan  áserli áýender otyrysqa erekshe mán berip, sánin kirgizdi. Sondaı-aq tusaýkeser rásimine Bolat Sarybaevtyń kelini Gúlnar Batyrbekova, nemereleri jáne jaqyn týystary da qatysyp otyrdy.

Bolat Shamǵalıuly Sarybaev (1927-1984) – kórnekti etnoaspaptanýshy ǵalym, qazaq etnoaspaptanýynyń negizin qalaýshy, qazaqtyń kóne mýzykalyq aspaptarynyń tuńǵysh ret tolyq ǵylymı sıpattamasyn jasap tereń zerttegen jáne olardy qaıta jańǵyrtyp, dybystalýy men tartylý ádisterin qalyptastyrǵan tulǵa. Ol Qurmanǵazy atyndaǵy Almaty memlekettik konservatorıasyn qobyz klasy boıynsha bitirip, halyq aspaptar kafedrasynda birneshe jyl qyzmet atqarǵan.

«Ǵalym murasy» atty alǵashqy jınaqqa ǵalymnyń maqalalary men qujattary, eńbekteriniń bıblıografıasy, fotomaterıaldary men ǵalym týraly estelikter jáne qazaq etnomýzykatanýshylarynyń Bolat Sarybaev týraly zertteý maqalalary toptastyrylǵan. Al, ekinshi jınaqqa «Qorqyt jáne Uly Dala sazy» halyqaralyq fólklorlyq-mýzykalyq óner festıvali aıasynda ótkizilgen «Bolat Sarybaev jáne túrki álemindegi etnoaspaptaný máseleleri» jáne «Qorqyt Ata murasy: epıkalyq mádenıet, halyq ańyz áńgimeleri jáne áýenderi» halyqaralyq ǵylymı-teorıalyq konferensıalarynyń materıaldary engizilgen.

«Túrki áleminiń IýNESKO-sy» degen atpen tanylǵan TÚRKSOI (Túrki mádenıetiniń halyqaralyq uıymy) 25 jyldan astam ýaqyt boıy túrki áleminiń mádenı murasyn halyqaralyq deńgeıde nasıhattaý, saqtaý jáne zertteý jumysyn belsendi túrde atqaryp keledi. Halyqaralyq uıym jyl saıyn túrki áleminiń mádenıeti men ónerin damytý maqsatynda túrli mádenı-shyǵarmashylyq sharalar (konsertter, kórmeler, plenerler, kezdesýler, qoıylymdar, ǵylymı-praktıkalyq konferensıalar jáne t.b.) uıymdastyryp otyrady.