Bul buryn-sońdy bolmaǵan narazylyq sherýi bolýy múmkin. Muny bılik te ańǵara bastaǵandaı. Óıtkeni halyqtyń jaǵdaıy ońalaıyn dep turǵan joq.

Qazir el astanasynyń eń basty kóshelerinde qaýipsizdik sharalary barynsha jasalyp jatyr. Árıne, quqyq qorǵaý organdary men mıtıńke shyǵatyn toptyń arasynda qaqtyǵys bolýy múmkin. Áıteýir adam ólimi oryn almasa boldy. Eń bir alańdatarlyǵy, bul jolǵy narazylyq sheksiz merzimge ulaspaq. Al halyqty mazasyzdandyryp otyrǵan máseleler jeterlik.

Búgin tús aýa el astanasyna keletin barlyq poıyzdar toqtaıdy. Qaýipsizdik úshin metrodaǵy qozǵalys ta shekteletin bolady. El astanasynda avtobýstardyń 30 paıyzy ǵana jolaýshylarǵa qyzmet kórsetedi. Osyǵan baılanysty paıda tabýǵa tyrysyp qalatyn taksıster baǵanyń qunyn ósirip jiberýge tyrysyp jatyr. Troleıbýstardyń 30 paıyzy ǵana búgin jumys istep, jolaýshylar tasymalymen aınalysady.

Áýe tasymaly da búgin óz qyzmetin toqtatady. El ishindegi 233 áýe  reısi búgin qyzmetin keıinge shegergenin málim etti. Keń aýqymdy jaǵdaıda ótetin bul narazylyq sherýi eldiń qazynasyna aýyr shyǵyn ákeleıin dep tur.

Qalaı bolǵanda da bul bılikke berilgen aýyr soqqy.

El astanasynda ornalasqan  basqa elderdiń elshilikteri qaýipsizdik úshin týrısik jáne issaparmen júrgen óz azamattaryna úndeý taratty. Elshilik ókilderi múmkindiginshe  kóshege kóp shyqpaýdy ótinip, eskertý jasady.

Sonda halyqtyń  kóshege shyǵýdaǵy maqsaty ne? Eń aldymen áleýmettik jaǵdaıdy qalpyna keltirý, zeınetaqy reformasyn qaıta qaraý. Búkil eldi qamtıtyń keń aýqymdy aksıany respýblıkanyń kásipodaqtar uıymy uıymdastyryp otyr. Bılik barynsha baqylaýdy kúsheıtpek. Biraq halyqpen arada teketires pen qaqtyǵys oryn alsa, adam ólimi oryn alýy múmkin. Jurtty da osy másele alańdatyp otyr.

...Eskerte keteıik, bul búgin tústen keıin Fransıa astanasy Parıjde bastalatyn keń aýqymdy narazylyq sherýi. Jalpy bılik pen halyqtyń dıalogqa kelgeni durys qoı. Sonda ǵana halyqtyń kóńili tynshıdy.