Yvision.kz aqparat platformasynyń Anton esimdi avtory bılik tranzıtiniń aıasynda birqatar strategıalyq mańyzy bar kadrlyq aýys-túıisterdiń bolatyn jazdy.

Avtordyń óz derekkózderine súıenip habarlaýynsha, Úkimet basshysy Asqar Mamın ornyn bosatady. Onyń jýyrda ǵana Elbasy qabyldaýynda bolýy sony aıǵaqtaıdy.

Mamınniń ornyna buǵan deıin mınıstrler kabınetin eki márte basqarǵan, Nazarbaevtyń kómekshisi bolǵanyn, bola da beretinin aıtqan Kárim Másimov keledi dep kútilýde. Al Másimovty almastyrýǵa, ıaǵnı ulttyq qaýipsizdik komıtetiniń tóraǵasy laýazymyna Qazaqstandaǵy eń jas general-leıtenant, Nazarbaevtyń nemere inisi Samat Ábish taǵaıyndalmaq.

Puls-zko.kz saıtynyń avtory Dana Dúısekenovanyń jazýynsha, Samat Ábishtiń saıası mánsaby munymen toqtamaı, "KGB" agenti bolǵan Pýtın sıaqty prezıdent atanyp ketýi de ǵajap emes. Bundaı senarı "kelesi prezıdent kim bolady?" degen saýal tóńireginde Darıǵa Nazarbaeva senarıimen qatar aıtylyp júr.

Sondaı-aq Dana Dúısekenova prezıdent ákimshiligi tóraǵasynyń burynǵy orynbasary Darhan Káletaevtyń ázirge esh qyzmetke barmaýyn oǵan jasalynǵan aqparattyq shabýylmen baılanystyrady. Avtor maqalasynda ıdeolog Darhan Káletaevtyń "memlekettik" blogerlerdiń tutas býynyn jasaqtaǵanyn, BAQ deńgeıin kótergenin, birneshe sátti medıa-jobalardy iske qosqanyn, Káletaevtyń endi bir oblysqa basshy nemese zeınetke ketken Tasmaǵambetovtyń ornyna barýy múmkin ekenin atap ótken.