Almaty ákiminiń baspasóz qyzmetiniń habarlaýynsha, bul rejım adamdar men jeke kóliktiń qala ishinde qajettiliksiz júrip-turýyna tyıym salýdy kózdeıdi. Azyq-túlik pen dári-dármekti alýǵa turǵylyqty jerge jaqyn ornalasqan dúkender men dárihanaǵa shyǵýǵa ruqsat etiledi. Sondaı-aq, úı janýarlaryn serýendetýge ruqsat bar.

65 jastan asqan turǵyndarǵa dalaǵa shyǵýǵa bolmaıdy. Sondaı-aq kámeletke tolmaǵandar qalada eresektersiz júrýine ruqsat joq.

Azyq-túlik, dári-dármek jáne birinshi kezektegi qajetti zattardy jetkizý qyzmetteri 9.00-den 22.00-ge deıin jumys isteıdi.

Bul rette barlyq uıymdar, kásiporyndar men qalalyq qyzmetter jumysqa tartqan qyzmetkerleriniń sanıtarlyq jaǵynan qorǵalýyn kúsheıtilgen rejımde qamtamasyz etýi tıis.

Tótenshe jaǵdaı rejımin buzǵany jáne kóshede sebepsiz júrgeni úshin eskertý, 26 510 tg kóleminde aıyppul nemese 15 táýlikke bas bostandyǵynan aıyrý túrindegi ákimshilik jaza qarastyrylǵanyn atap ótken jón.

Menshik nysanyna qaramastan uıymdar men kásiporyndardyń basshylary kórineý jalǵan aqparat bergeni úshin, sondaı-aq qyzmetkerlerge anyqtama bergeni úshin jáne óndiristik nemese qyzmettik qajettilikten týyndamaǵan qyzmetkerlerdiń qozǵalýy týraly derekter bergeni úshin qylmystyq jaýapqa tartylady.

Shekteý qalalyq basqarý organdaryna, azyq-túlik, medısınalyq nysandarǵa, qalanyń úzdiksiz tynys-tirshiligin jáne qaýipsizdigin qamtamasyz etetin qyzmetter men BAQ-qa qoldanylmaıdy.

Almaty qalasy polısıa departamentiniń málimeti boıynsha, tótenshe jaǵdaı rejımin buzǵany úshin aǵymdaǵy jyldyń 19 naýryzynan bastap 336 adam QR ÁQBtK-niń 476-baby boıynsha ákimshilik jaýapkershilikke tartyldy, onyń 113-i sot sheshimimen ákimshilik qamaýǵa alynsa, qalǵandaryna aıyppul salyndy.

Aǵymdaǵy jyldyń 5 sáýirindegi málimetter boıynsha, Almatyda COVID-2019 juqtyrýdyń 115 oqıǵasy zerthanalyq túrde rastaldy. Aǵymdaǵy jyldyń 5 sáýirinde saǵat 20.00-degi jaǵdaı boıynsha qalada koronavırýstyq ınfeksıany juqtyrý oshaǵynyń 33 aımaǵy bar. Inkýbasıalyq kezeńniń aıaqtalýyna baılanysty oshaqtyń 14 aımaǵynan shekteý sharalary alynyp tastaldy.

Sýyq tıý belgileri paıda bolǵan jaǵdaıda 103-ke qońyraý shalyńyz. Anyqtama úshin 1406 call-ortalyq jáne 1308 nómiri boıynsha Open Almaty qoǵamdyq qabyldaýy jumys isteıdi.