12 mamyr – Halyqaralyq meıirbıkeler kúni. Mereke kúni halyqqa adal qyzmet etip júrgen aq halatty abzal jandardyń ómiri men qyzmeti jaıly syr shertýdi jón kórdik. Qalada eńbek etip jatqan meıirbıkeler syndy eldiń túkpir-túkpirinde halyqqa táýlik boıy qyzmet etýge aıanbaı, eldiń medısına salasyna úles qosyp júrgen mamandar óte kóp. Búgingi merekege oraı Strategy2050.kz tilshisi Aqmola oblysynyń  Maqpal aýylynda meıirbıke bolyp eńbek etip júrgen Álıa Ǵabbasqyzymen áńgimelesti.

Álıa Hasenova tabıǵaty sulý kerbez Kóksheniń baýraıyndaǵy shaǵyn aýylda dúnıege kelgenin aıtady.

– Aqmola oblysynyń Birjan sal aýdanyna Qarasty Qoǵam aýylynda 1969 jyly dúnıege keldim. Otbasymdaǵy segiz balanyń kenjesimin. Anam kolhoz kezinde saýynshy bolyp jumys istegen 40 jyl eńbek ótili bar eńbek ardageri edi. Al, ákem aýyldyq jumys komıtetiniń tóraǵasy, brıgadır, keıin poshta meńgerýshisi boldy. Osy syndy basqarý qyzmetinde júrip, keıin densaýlyǵy syr bere  bastady. Júrek aýrýy, keıin oǵan ókpesi qosyldy. Sol kezdegi balalyq armanym dáriger bolyp, ákemdi emdep shyǵarý edi. Osy maqsat meıirbıke mamandyǵyn tańdaýǵa negiz boldy, – dedi Á.Hasenova.

Ol aıtqandaı, orta mektepti támamdaǵan soń armanyn oryndaý úshin qalaǵa oqýǵa attanady.

– Kókshetaý qalasyndaǵy ýchılısheni 1989 jyly támamdadym. Eń alǵash jumys istegen ornym Stepnák qalasyndaǵy balalar bólimshesi boldy. Odan keıin Bulandy, Qoǵam aýyldarynda da jumys istep kórdim. Al 1995 jyldan bastap turmys qurýyma oraı Maqpal aýylynda meıirbıkemin, - dedi Álıa Ǵabbasqyzy.

Meıirbıke 31 jyl ómirin osy salaǵa arnaǵan. 2018 jyly joǵary sanatty dárejeni Kókshetaý qalasynda qorǵap shyǵady.

– Meıirbıke isiniń negizgi maqsaty adam densaýlyǵyn qorǵaý qajettigin qanaǵattandyrýǵa negizdeledi. Sondyqtan da el ishinde adamdardy, otbasylardy, halyqty fızıkalyq, psıhıkalyq, áleýmettik potensıalyn júzege asyrýǵa úıretýge tyrysamyn. Óıtkeni meıirbıke isiniń negizgi fılosofıasy ómirdi, adamnyń quqyǵy men abyroıyn syılaý, jeke tulǵa retinde qarastyrý bolyp tabylady, - deıdi ol.

Meıirbıke bir salada uzaq jyldar boıy qyzmet etýdiń syry otbasy músheleriniń qoldaý kórsetkeninde dep esepteıdi.

– Joldasym ekeýmiz eki bala tárbıelep ósirdik. Ulym Almas ben qyzym Ásel boı jetti. Qyzym bir jyl buryn turmys qurǵan. Ózim de áje bolýǵa daıyndalyp júrmin. Urpaǵym eshkimniń ala jibin attamaıtyn, adal jandar bolyp qalyptasatynyna kámil senemin, - deıdi ol. 

Meıirbıkeniń aıtýynsha, aıaqasty jumysqa shaqyrǵan kezderi bir otbasy bolyp jumyla áreket jasaıdy.

– Jumys keıde qaýyrt bolady. Kún-tún demeı jumysqa shaqyrtyp qalatyn kezder de barshylyq. Joldasym shaǵyn mal sharýashylyǵymen aınalysady. Ol úı janýarlaryn baptaǵan soń, olardyń jaǵdaıyn jasaǵan soń, meniń de jumysyma túsinýshilikpen qaraıdy. Shaqyrtyp qalsa, «tezdet», «jyldam jet» dep aıtyp otyrady. Ulym úıde bolsa, kóligin ázirlep, saqadaı saılanady. Otbasymnyń qoldaýy jaqsy, - dedi ol.

 Mamannyń aıtýynsha, meıirbıke – densaýlyq saqtaý salasynyń negizgi qozǵaltqysh kúshi. Ol kóp jyldar boıy qajyrly eńbektiń qaıyry bolady dep esepteıdi.

– Turǵyndarǵa medısınalyq kómek kórsetýdiń tıimdiligi kóp jaǵdaıda meıirbıke jumysyna tikeleı baılanysty. Óz aýylymda atqaryp júrgen eńbegimdi baǵalap, 2019 jyly Aýdan ákimi alǵys hatpen marappattady. 2016 jyly Bas dárigerdiń gramotasyna ıe bolǵam, - dedi Á.Hasenova.

Sonymen qatar, meıirbıke TJ men karantın kezinde aýylda atqarylǵan sharalarǵa toqtap ótti.

– Koronavırýs óte qaýipti indet. Aýyldyq deńgeıde biraz jumystar atqaryp jatyrmyz. Turǵyndarǵa aqparattyq túsindirý jumystaryn júrgizdim. 2-3 adam karantındik jaǵdaıda úılerinde otyrdy. 14 kún boıy sol turǵyndardyń densaýlyqtaryn qadaǵaladym. Ystyqtaryn ólshep, eshqaıda shyqpaýǵa jaǵdaı jasap, járdemdestik, - dedi Á.Ǵabbasqyzy.

Meıirbıke halyqqa qyzmet etken saıyn meıirlene túsetinin jetkizdi.

Halyqaralyq deńgeıde toılanatyn meıirbıkeler kúniniń tarıhyna toqtap ótsek. 1971 jyly Dúnıejúzilik Medbıkeler Keńesiniń uıǵarymymen bastaý alyp, sodan beri Medbıkeler kúni dep atalyp kele jatqan osy kúndi resmı mereke retinde atap ótý búginde dástúrge aınalyp otyr.

12 mamyr – medbıke isiniń negizin salýshy, aǵylshyn medbıkesi Florens Naıtıngeıldiń týǵan kúni. Florens Naıtıngeıl Qyrym soǵysy kezinde (1853-1856) tuńǵysh bolyp meıirbıkeler qyzmetin uıymdastyrǵan.

Sondyqtan Halyqaralyq Meıirbıkeler keńesi osy dańqty áıeldi máńgilik este qaldyrý maqsatynda 12 mamyrdy Halyqaralyq meıirbıkeler kúni dep qabyldap, sol jyldan beri osy kún densaýlyq saqtaý salasynda erekshe mereke retinde toılanyp keledi.

Álemniń 141 elinen meıirbıkeler jınalyp «Halyqaralyq Medbıkeler Keńesi» dep atalatyn qoǵamdyq uıym qurǵannan keıin 12 mamyr - Dúnıejúzilik meıram mártebesine ıe boldy. Qazaqstan Táýelsizdigin alǵannan keıin bizdiń elimizde de 12 mamyr - meıirbıkeler kúni bolyp resmı túrde tirkeldi.