Óskemen áýejaıynyń burynǵy basshylyǵyna qatysty tergeý aıaqtaldy. Olar senip tapsyrylǵan múlikti asa iri kólemde ıemdený jáne qylmystyq jolmen alynǵan qarajatty zańdastyrý faktileri boıynsha aıyptylyp otyr, dep habarlaıdy Qarjylyq monıtorıń agenttigi.
Áýejaıdyń burynǵy prezıdenti men ózge de laýazymdy tulǵalary bes jyl boıy eńbekaqyny negizsiz kóbeıtip, jalǵan syıaqylar men jalǵan sharttar jasaý arqyly júıeli túrde aqsha jymqyrǵan. Artynan ony kasa arqyly qolma-qol aqshaǵa aınaldyryp otyrypty.
"Budan bólek, áýejaıǵa tıesili kólik quraldary býhgalterlik esepten shyǵarylyp, naryqtaǵy qunynan birneshe ese tómen baǵamen senimdi tulǵalarǵa satylǵan. Al áýejaıdyń komersıalyq nysandary jeńildetilgen sharttarmen jalǵa berilgen. Osylaısha, jaldaý aqysy tómendetilip, naqty jalǵa berilgen aýmaq azaıtylyp kórsetilgen", - delingen resmı habarlamada.
Memleketke keltirilgen jalpy zalal 157 mln teńgeni qurady. Qazirgi kezde sot sanksıasymen kúdiktilerdiń 126 mln teńge kólemindegi múlkine, sonyń ishinde 4 páter, jer ýchaskesi jáne 2 avtokólikke tyıym salyndy.
Kúdiktilerdiń bári qamaýǵa alyndy.
