Qazaqstandyq ártis Qaırat Kemalovtyń qaıtys bolǵany belgili boldy. Onyń qazasy týraly Qaraǵandy oblysynyń ákimi habarlady. Ermaǵanbet Bólekpaev Instagram-paraqshasynda marqumdy eske alyp, jazba jarıalady.
"69 jasqa qaraǵan shaǵynda Qazaqstannyń eńbek sińirgen qaıratkeri, kórnekti akter Qaırat Kemalov ómirden ótti. Ol búkil sanaly ǵumyryn teatr salasyna arnady. Qaırat Kemalovtyń ónerdegi mansaby Qaraǵandyda bastalǵan edi. Onyń ónerdegi jetistikteri halyqaralyq dárejede joǵary baǵalanyp, túrli marapattarǵa ıe boldy. Ol túrli tarıhı obrazdardy somdaýda akterlik sheberligimen kórine bildi", – dep jazdy ákim.
Qaırat Kemalov – akter, Qazaqstannyń eńbek sińirgen qaıratkeri. inkaraganda.kz saıtynyń málimetinshe, ol 1957 jyly 8 qańtarda Qaraǵandy oblysyndaǵy Aqtúbek aýylynda dúnıege kelgen. Almaty, Qaraǵandy jáne Astana teatrlarynda jumys istegen. 1995 jyldan beri Sáken Seıfýllın atyndaǵy Qaraǵandy oblystyq qazaq drama teatrynyń akteri boldy. Onyń jarqyn jobalarynyń biri – "Altyn taq" (2019) fılmi.
