Qujattardy qabyldaý egov.kz portaly arqyly júzege asady. Pandemıaǵa baılanysty talapkerlerge medısınalyq anyqtama usynbaýǵa ýaqytsha ruqsat etiledi, dep habarlaıdy elorda ákimdiginiń resmı saıty.

Elordalyq 22 kolejge 2020-21 oqý jylyna arnalǵan memlekettik bilim berý granty (12 memlekettik, 10 jeke menshik) 4 652 orynǵa bólindi. Onyń ishinde jergilikti búdjet esebinen – 3 602 oryn, nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy boıynsha – 1050 oryn qarastyrylǵan.

«Tapsyrys ekonomıkanyń mynadaı salalary arasynda bólinedi: bilim – 865, medısına, farmasevtıka – 250, óner jáne mádenıet – 165, geologıa – 25, servıs jáne qyzmet kórsetý, marketıń – 1000, energetıka – 200, kólik – 245, óndiris, montajdaý, tehnıkalyq qyzmet kórsetý jáne jóndeý – 725, baılanys, telekomýnıkasıa jáne aqparattyq tehnologıalar – 700, qurylys, komýnaldyq sharýashylyq, ekologıa – 477», – dep habarlady qalalyq bilim basqarmasy.

2020-21 oqý jylynda memlekettik tapsyrys aıasynda 13 mamandyq boıynsha 139 orynǵa erekshe bilim berýge qajettiligi bar balalardy qabyldaý josparlanyp otyr.

TjKB mamandaryn daıarlaýǵa memlekettik bilim berý tapsyrysyn ornalastyrý týraly aqparat bilim basqarmasynyń http://bilim.astana.kz resmı saıtynda jarıalanǵan.

TjKB uıymdarynyń 2020-21 oqý jylyna qabyldaý jospary 8 myń adamdy quraıdy. Kolejderge qujat qabyldaý 20 maýsymnan 25 tamyzǵa deıin (jumysshy kadrlar úshin 27 tamyzǵa deıin) egov.kz elektrondy úkimet veb-portaly arqyly júzege asady.

Sondaı-aq sanıtarlyq-epıdemıologıalyq normalardy saqtaı otyryp, kolejdiń qabyldaý komısıasy arqyly qaǵaz túrinde qabyldanady.

«Talapkerlerge TjKB uıymdaryna qujat tapsyrý kezinde medısınalyq anyqtamalardy (№ 086-Ý, İ jáne İİ toptaǵy múgedekter men bala jasynan múgedekter úshin 088-Ý nysany boıynsha medısınalyq-áleýmettik saraptama qorytyndysyn), odan keıingi merzimde – oqý jyly bastalǵanǵa deıin usynbaýǵa ruqsat etiledi. Memlekettik tapsyrys boıynsha oqýǵa baıqaý atestattyń jıyntyq baly negizinde ótkiziledi», – dedi bilim basqarmasy ókilderi.