24 tamyz kúni Qyzylordada kópbalaly analar balalarynyń qashyqtan bilim alýǵa daıyn emesin aıtyp, ákimdiktiń aldynda shý kóterdi. Bul týraly Astana telearnasy habarlady.

Telearnanyń habarlaýynsha, shendiler jınalǵandardy avtobýsqa otyrǵyzyp alyp ketip, jıyndy mektepte ótkizgen. 

– Ár balanyń oqý quraldaryna otyz myńnan berilsin. Bizge kıim-keshegi kerek emes. ASP-nyń prodýktysyn berip jatyr. Adam jeıtin nárse emes. Tek sútin ǵana iship jatqan shyǵarmyn, – dedi kóp balaly ana Jadyra Salybaeva.

Analar bılikten qarjylaı qoldaý surap otyr. Olar jańa oqý jyly bastalýyna sanaýly kún qalsa da, qashyqtan oqýǵa qajetti tehnıkalar qoldaryna tımegenine narazy.

Olar kompúter, planshetti qaıtaryp alatynyna shaǵymdanyp otyr.

– Kompúter, planshetti qaıtyp alamyz deıdi. Sony bizge qaıtarymsyz qylyp bersin. Qyrkúıektiń onyna deıin belgili bolady dedi. Sol ýaqytqa deıin balalarym sabaqqa barmaıdy, – dedi kóp balaly ananyń biri.

Telearna aqparatyna saı, Qyzylorda oblysy ákiminiń orynbasary Naýryzbaı Baıqadamov máseleniń barlyǵy zań sheńberinde sheshiletinin, halyqtyń talap-tilegi orynsyz ekendigin aıtty.

– Mektepten 9 400-den astam kompúterler taratylyp beriledi. Qazir jumys júrip jatyr. Respýblıkalyq búdjetten 22 800-den astam elektrondy qurylǵylar alynatyn bolady. Memlekettiń múlki bolǵandyqtan, ony taratyp bere almaımyz. Óıtkeni zań aldynda jaýap beretin bolamyz, – dedi ol.

Oblystyq bilim bóliminiń málimetinshe, jetim jáne ata-ana qamqorynsyz qalǵan balalardyń toqsan paıyzy qajetti tehnıkamen qamtylǵan. Odan ózge demeýshiler esebinen de júzdegen bala qurylǵyǵa qol jetkizipti. Al daý týdyrǵan jaǵdaıy tómen otbasynyń balalaryna beriletin zamanaýı quraldar bir aıdyń kóleminde ıelerine tabystalady dep sendirdi.