L.N.Gýmılev atyndaǵy Eýrazıa ulttyq ýnıversıteti men «QAZAQ RADIOLARY» seriktestigi shyǵarmashylyq jáne kásibı baılanysty arttyrý maqsatynda memorandýmǵa qol qoıdy.

Aldymyzda Qazaq radıosynyń 100 jyldyǵy jáne L.N.Gýmılev atyndaǵy Eýrazıa ulttyq ýnıversıtetine 25 jyl tolady. Aıtýly merekelerdiń qarsańynda qazaq úni – «QAZAQ RADIOLARY» seriktestigi men Eýrazıa ulttyq ýnıversıteti jastardyń kásibı biliktilikterin artyp, bilimderin keńeıtip, talanttaryn asha túsýge muryndyq bolatyn kelisim jasady.

Memorandým maqsaty – kadrlardy daıyndaý isinde shyǵarmashylyq jáne kásibı qatynastardy arttyrý, birlesken sharalar uıymdastyrý jáne tájirıbe almasý.

L.N.Gýmılev atyndaǵy Eýrazıa ulttyq ýnıversıtetiniń rektory, profesor Erlan Báttáshuly: «Memorandým aıasyndaǵy maqsat aıqyn. Maqsat bir. Ýnıversıtettiń alǵashqy resmı mereıtoıy kele jatyr. Sonyń negizinde radıoda ýnıversıtet tulǵalaryn tanystyryp, estelikteri men jetistikterin aıtyp otyratyn júıeli habarlar kompleksi júrse dep usynysyn aıtty. Bastysy, qaı jerde de nátıje bolǵany durys» dep oıyn bildirdi.

Rektor kelisim negizinde ortaq is-sharalar ótkizilip, stýdentterdiń oqý jáne óndiristik tájirıbeden ótýine jáne jańa jobalarmen jumys isteýge jaǵdaı jasalatynyn aıtty.

Al «QAZAQ RADIOLARY» JSHS dırektory Ernur Býrahan:

– «Bıyl Qazaq radıosynyń 100 jyldyǵy bolsa, kelesi jyly «Shalqar» radıosynyń 55 jyldyǵy. Búgingi kúni bizdiń ujymnyń 10 paıyzyn Eýrazıa ulttyq ýnıversıtetiniń túlekteri quraıdy, keıbir mamandarymyz bul bilim ordasynda ustazdyq qylady. Qazirgi ýaqytta Qazaq radıosynyń «Altyn qoryndaǵy» eń asyl dúnıelerdi, eskini qaıtaryp jatqan jaıymyz bar» dedi óz sózinde.

Kelisim barysynda Ernur Kósherhanuly stýdenttermen birge 24 saǵattyq onlaın radıo jumysyn bastaý týraly usynys aıtty. Jańa bastama arqyly ýnıversıtettiń bilim alýshylary kásibı turǵydan ósip, jańa bir álemmen tanysady. Ýnıversıtet qabyrǵasyndaǵy radıostýdıada ózderine unaıtyn taqyrypta habar daıyndap, radıoǵa usynýlaryna múmkindik týady. Eń úzdik habarlar respýblıkalyq deńgeıge shyǵady. Aldaǵy ýaqytta stýdentterdiń bul ónimderi jumysqa ornalasýǵa da zor múmkindik beretinin aıtty.

Ásem TAŃATAR,

EUÝ stýdenti