«Nur Otan» partıasy óńirlik fılıaldarynda ótetin konferensıalardyń kestesin jarıalady. Onyń barysynda barlyq deńgeıdegi máslıhattarǵa partıalyq tizimder jáne ár óńirden Májiliske partıalyq tizimge kandıdattar anyqtalatyn bolady.

Sonymen, konferensıa 10 qarashada – Shymkent qalasynda, 11 qarashada – Almaty qalasynda, 12 qarashada – Nur-sultan qalasynda ótedi. Almaty, Qaraǵandy jáne Qyzylorda oblystarynda – 16 qarashada, al Aqmola, Shyǵys Qazaqstan, Jambyl, Batys Qazaqstan, Túrkistan, Atyraý, Qostanaı, Mańǵystaý, Pavlodar jáne Soltústik Qazaqstan oblystarynda – 17 qarashada ótpek.

Partıanyń baspasóz qyzmeti habarlaǵandaı, pandemıa jaǵdaıyna baılanysty partıalyq konferensıalar barlyq sanıtarlyq-epıdemıologıalyq talaptardy saqtaı otyryp uıymdastyrylady. Bul rette partıanyń resmı akkaýnttarynda barlyq óńirlik konferensıalardyń onlaın-kórsetilimi qamtamasyz etiledi.

Konferensıalarda sheshim qatysýshy delegattardyń kópshilik daýysymen qabyldanady. Daýys berý «Praımerız» aqparattyq júıesinde ótetin pikirsaıystardyń qorytyndylary boıynsha daýys berýdi qospaǵanda, delegattyń qol nemese mandatyn kóterýi arqyly ótkiziledi.

Konferensıa barysynda qatysýshylar arasynda pikirsaıys uıymdastyrylady. Birinshi raýndta úmitkerler aýdan nemese qalanyń máselelerin sheshýge qatysty ózderiniń kózqarastaryn usynýy kerek. Ekinshi raýnd – «suraq-jaýap» formatyndaǵy pikirtalas sesıasy.

Partıanyń Ortalyq apparaty bekitken fılıal konferensıalarynyń árbir kezeńin reglamentteıtin nusqaýlyqqa sáıkes, Májiliske úmitkerler, respýblıkalyq mańyzy bar qalalardy qospaǵanda, eki ret – aýdandyq, qalalyq jáne oblystyq konferensıalarda pikirsaıys ótkizedi.

Parlament tómengi palatasynyń qazir qyzmettigi depýtattary birden oblystyq, sondaı-aq respýblıkalyq mańyzy bar qalalardaǵy konferensıalardyń pikirsaıystaryna qatysa alady.

Pikirsaıys qorytyndysy boıynsha eń kóp daýys jınaǵan kandıdat Májilistiń partıalyq tizimine pikirsaıysqa qatysýshy retinde oblystyq konferensıaǵa usynylady. Árbir aýdan, qala Májilistiń partıalyq tizimine pikirsaıysqa bir qatysýshyny usynady. Oblys ortalyǵy Májilistiń partıalyq tizimindegi óńirdiń ókildik kvotasyna teń sanda pikirsaıysqa qatysýshylardy usynady.

Oblystyq máslıhattarǵa partıalyq tizimder tıisti konferensıalarda, al Májiliske qorytyndy tizim «Nur Otan» sezinde bekitiledi.

Aıta keteıik, óńirlik konferensıalarda úmitkerler arasynda pikirsaıystar praımerızdiń ekinshi kezeńi aıasynda ótkiziledi.

Partıaishilik irikteýdiń birinshi kezeńine 10 myńǵa jýyq kandıdat qatysty. Olardyń 37%-ti – áıelder, 29%-ti – 35 jasqa deıingi jastar. Bastaýysh partıa uıymdarynan kandıdattardyń 30%-i usynylsa, al 70%-i – ózin-ózi usynýshylar. Kandıdattardyń ortasha jasy – 43 jas. Bul rette daýys berýge 662 myńnan asa partıalyq qatysty.

Partıaishilik praımerız – Elbasy, «Nur Otan» partıasynyń Lıderi Nursultan Nazarbaevtyń bastamasymen qolǵa alynǵan partıa jumysyn qaıta jandandyrý baǵdarlamasynyń qorytyndy kezeńderiniń biri.

Bul týraly tolyǵyraq aqparatpen primaries.kz saıtynan tanysýǵa bolady