Nur-Sultan qalasynyń oqýshylary qaı pánderdi offlaın oqıtyny belgili boldy. Bul týraly qalalyq bilim basqarmasynyń basshysy Sholpan Qadyrova habarlady.
– 11 qańtardan bastap oqý jylynyń úshinshi toqsany bastalady. 1-5-synyp oqýshylary kezekshi synyptar rejıminde oqýlaryn jalǵastyrady. Conymen qatar, III toqsanda bitirýshi 9 jáne 11 (12)-synyp oqýshylary aralas formatta 15 adamnan aspaıtyn kezekshi synyptar rejıminde oqýdy bastaıdy dep josparlanýda. Naqty sheshim qalamyzdaǵy epdemıalogıalyq jaǵdaıǵa baılanysty bolady.
Offlaın ótetin sabaq kestesine orys tili men ádebıeti, qazaq tili men ádebıeti, shet tili, algebra, geometrıa, fızıka, hımıa, bıologıa, geografıa, Qazaqstan tarıhy, dúnıejúzi tarıhy pánderi kiredi. Bul oqytý pánderiniń 70%-yn quraıdy. Pánderdiń 30%-y: ınformatıka, ózin-ózi taný, dene shynyqtyrý, quqyq negizi, alǵashqy áskerı tehnologıalyq daıyndyq pánderi qashyqtan oqytylady. Varıatıvti komponenttiń pánderi kestege sáıkes asınhrondy túrde júrgiziledi, – dedi ol.
Mektepterde ıkemdi sabaq kesteleri jasalyp, sabaqtar arasyndaǵy úzilister ár synyp úshin ár túrli ýaqytta uıymdastyrylady. Sabaq ýaqyty 30 mınýttan aspaıdy. Al úzilis ýaqyty – 5 mınýt.
"Sabaq kestesin qurý kezinde joǵary synyp oqýshylarynyń jas erekshelikteri, olardyń qabiletteri men qajettilikteri, sondaı-aq 11-synyp oqýshylarynyń jańartylǵan bilim berý mazmunyna kóshýi jáne kiriktirilgen sabaqtardy ótkizý múmkindigi eskeriledi.
Sondaı-aq sabaqtan tys ýaqytta oqýshylardyń oqýdaǵy olqylyqtarynyń ornyn toltyrý jáne qorytyndy atestattaýǵa daıyndyq úshin 5 adamnan aspaıtyn toptarda jeke konsýltasıalar uıymdastyrylady. Bul konsýltasıalarǵa oqýshylar qajettiligene qaraı ata-analardyń kelisimimen qatysýyna bolady" delingen qalalyq bilim basqarmasynyń baspasóz qyzmetiniń habarlamasynda.
Pikir qaldyrý