El Prezıdenti Qasym-Jomart Toqaev bıyl halyqqa arnaǵan «Jańa jaǵdaıdaǵy Qazaqstan: is-qımyl kezeńi» kezeńi Joldaýynda mıllıondaǵan aýyl turǵyndarynyń tabysyn arttyrý mindetin qoıǵan bolatyn. Bul rette sheshimin tappaı kele jatqan ózekti máseleler bar ekenine de ashyq toqtaldy. Sonyń biri – uzaq merzimge beriletin arzan nesıeniń joqtyǵy ekenin atap kórsetti. Osy oraıda «Agrarlyq nesıe korporasıasy» AQ bul olqylyqtyń ornyn toltyryp kele jatyr. Búginde elimizdiń túkpir-túkpirinde ornalasqan 158 eldi-mekende 206 nesıe seriktestigi jumys isteıdi. Osylaısha, aýyldyq aımaqtardyń 98 paıyzy tıimdi nesıemen qamtylǵan.

Solardyń biri – Túrkistan oblysyna qarasty Qarnaq aýylynda ornalasqan «Iassy nesıe» seriktestigi. Búginde bul qarjy ınıstıtýty Agrarlyq nesıe korporasıasynyń senimdi seriktesine aınalyp úlgergen. Kásibı tilmen aıtqanda, «IassyNesıe» AAA reıtıńine ıe, ıaǵnı shaýaralardy tıimdi sharttar boıynsha óz betinshe nesıeleýge quqyly. 2003 jyldan beri jumys istep kele jatqan nesıe seriktestigi Kentaý qalasy men jaqyn mańdaǵy on aýyldyń aýyl sharýashylyǵy taýar óndirýshilerin qamtıdy. "Iassy nesıe" JSHS-niń basqarma tóraǵasy Alısher  Iýldashovtyń aıtýynsha, búginde onyń quramynda 1500 quryltaıshy bar, ári olardyń sany kún sanap artyp keledi. Bıyldyń ózinde olar 440 kásipkerge nesıe berip, óz kásibin damytýǵa septigin tıgizipti. Bul rette negizinen aýyl sharýashylyǵy salasyna basymdyq berilip otyr. Ózin ǵana emes, ózgeni de jumyspen qamtyp otyrǵan kásipkerler kásip bastamas buryn qorqaqtaıtyny jasyryn emes. Alaıda, óziniń bıznes jobasyn qorǵap, kásibin dóńgeletemin degen jandar úshin «Iassy nesıe» JSHS-i kómek qolyn sozýda.

Nesıe alǵan kásipkerlerdiń biri - «Ergesh ata» SHQ-nyń basshysy Habıb Bahadúr. Ol 2018 jyly óz isin bastaýǵa bel býyp, nesıelik seriktestikten 65 mln.teńge alǵan. Bul qarjyǵa ol Reseıden sımmental tuqymdy etti-sútti baǵyttaǵy 100 bas sıyr alyp keledi. Sodan beri mal basyn kóbeıtip, búginde sharýa qojalyǵyn damytyp otyr. Sharýasyn shyr aınaldyrǵan kásipker búginde Kentaý qalasy mańyndaǵy «Aman-Esen» sút sehymen kelisimshart jasasyp, ónimin ótkizip otyr. Bir sıyr kúnine 15-20 lıtr sút beretin kórinedi. «Iassy nesıe» JSHS-men jumys isteý kásipkerler úshin tıimdi ekenin aıtqan Bahadúr bolashaqta sharýa qojalyǵyn damytý maqsatynda taǵy da nesıe alǵysy keletinin jasyrmady.

Al «Iassy» jylyjaıyn gúldendirip, halyqty balǵyn ónimmen qamtamasyz etip otyrǵan Iýldashov Shahrýh ta osy nesıelik seriktestiktiń kómegimen kásibin bastaǵan. Sharýanyń 25 mln.teńge nesıe alyp ashqan jylyjaıy búginde 35 gektar jerdi alyp tur. Jylyna eki ret ónim alady. Birinshi ret qıardan 35-40 tonna ónim alǵan, al ekinshi ret qyzanaqtan da 35 tonnaǵa jýyq ónim alýdy josparlaýda. Alynǵan ónimdi Kentaý, Túrkistan qalalaryna jetkizedi. Kásibin ashýǵa kómektesken nesıelik seriktestikke óz alǵysyn bildirgen Shahrýh bolashaqta jylyjaıdy keńeıtý maqsatynda taǵy da nesıe alǵysy keletinin atap ótti.

Aıta keterligi, kásip ashýǵa alynǵan qarjynyń qaı baǵytta jumsalyp jatqandyǵy mindetti túrde tekserilip, monıtorıń júrgizilip otyrady. Tutynýshyny jyly júzben qarsy alatyn seriktestiktiń mamandary árdaıym óz keńesterin berip, durys baǵyt-baǵdar kórsetýge ázir. Aýyldy aımaqtan kásip ashýshylardyń kóbeıip, aýyl sharýashylyǵyn damytyp otyrǵan kásipkerler kóńilge eriksiz qýanysh uıalatady. Bir qýantarlyǵy, kásip ashqan jandardyń barlyǵy derlik ózin ǵana oılap qoımaı, jergilikti turǵyndardyda jumyspen qamtyp otyr. Bul ıgi iste nesıelik seriktestiktiń de úlesi zor.

«Agrarlyq nesıe korporasıasy» baspasóz qyzmeti