Prezıdent Qasym-Jomart Toqaev reformalar jónindegi joǵarǵy keńestiń úshinshi otyrysynda úkimetke aldaǵy halyq sanaǵyna qatysty birqatar tapsyrma júktedi. 

Memleket basshysy halyq sanaǵy turǵyndardyń naqty sanyn, onyń jas jáne genderlik quramyn, ýrbanızasıa deńgeıin, tabys kólemi men basqa da mańyzdy taldaý derekterdi anyqtap, tekserilgen ári dáıekti basqarýshylyq sheshimder qabyldaýǵa múmkindik beretinin atap ótti. 

Toqaev atalǵan sharadan meıilinshe mol maǵlumat alý úshin saýalnamanyń mazmunyna kóńil bólý qajet ekenin aıtty.

Bul rette prezıdent azamattarǵa asa kóp saýal qoımaýdy jáne sanaqty ótkizýdiń ońtaıly joldaryn paıdalanýdy, onyń ishinde, pandemıanyń taralýyna jol bermeýge baılanysty shekteýlerdi eskere otyryp, sıfrlyq tehnologıalardy keń qoldanǵan jón dep sanaıdy.

Qasym-Jomart Toqaev úkimetke premer-mınıstrdiń birinshi orynbasarynyń tóraǵalyǵymen arnaıy jumys tobyn qurýdy tapsyrdy.

Atalǵan top uıymdastyrý jáne negizgi máselelerdi sheshýmen, sondaı-aq, daıyndyq jumystaryn úılestirip, ony iske asyrýmen aınalysady.

Aıta keteıik, ulttyq sanaq osy jyldyń qazan aıynda ótkizilip, al 2022 jyldyń ortasyna qaraı úkimet naqty málimetterdi jarıalaýy tıis.