Úkimet prezıdent Qasym-Jomart Toqaevqa 2025 jylǵa deıingi ulttyq damý josparyn usyndy. Bul týraly Aqorda saıty habarlady.

Resmı saıttyń málimetine súıensek, úkimet usynǵan 2025 jylǵa deıingi ulttyq damý josparynyń jobasy 12 strategıalyq baǵyttan turady. Olar ınstıtýsıonaldyq, ekonomıkalyq jáne áleýmettik bolyp 3 salaǵa bólingen.

"Damý jospary boıynsha 2025 jylǵa qaraı ósim deńgeıi 5 paıyzǵa artyp, jalpy ishki ónimdegi shaǵyn jáne orta bıznestiń úlesi 35 paıyzǵa deıin, negizgi kapıtalǵa tartylǵan ınvestısıalar kólemi JİÓ-niń 30 paıyzyna deıin, shıkizattyq emes eksportty 2 esege, ıaǵnı, 41 mıllıard teńgege deıin, eńbek ónimdiligin 45 paıyzǵa ulǵaıtý negizgi kórsetkish bolmaq.

Qazaqstandyqtardyń turmys deńgeıi men sapasyn arttyrý jónindegi sharalardyń nátıjesinde azamattardyń ómir súrý uzaqtyǵy 75 jasqa deıin ulǵaıýy tıis" delingen habarlamada.

Sondaı-aq Qazaqstannyń halyqaralyq reıtıńterdegi deńgeıin, atap aıtqanda, oqýshylardyń bilim kórsetkishteri, sıfrlyq básekege qabilettilik, zań ústemdigi ındeksteri boıynsha jaqsartý josparlanýda.

– Strategıalyq kórsetkishterdiń egjeı-tegjeıli kartasy – Ulttyq jospardyń ajyramas bóligi. Soǵan sáıkes árbir memlekettik organǵa jáne iri kvazımemlekettik uıymǵa belgilengen kezeńde qol jetkizýge tıis naqty kórsetkishterdiń tizbesi bekitiledi. Kórsetkishterdiń nátıjesi aqıqattan alys bolmaýy kerek. Degenmen ońaı qol jetetin jáne yntalandyrmaıtyn ındıkatorlardy maqsat etýge bolmaıdy, – dedi josparmen tanysqan prezıdent.

Prezıdent atalǵan qujatqa Ulttyq jospar búgingi jahandyq úrdisterdi eskere otyryp, el damýynyń negizgi baǵdarlary men sıfrlyq parametrlerin qalyptastyratynyn atap ótti.

– Bizdiń basty maqsatymyz – básekege qabilettilik deńgeıin arttyrý jáne álemniń damyǵan memleketteriniń qataryna kirý, – dedi Toqaev.

Ulttyq damý josparynyń aıasynda usynylǵan reformalardyń kóbisi Kásipkerlik, Búdjettik jáne Salyq kodeksi sıaqty zańnamalyq aktilerge ózgerister engizýdi qajet etetinin eskere otyryp, memleket basshysy úkimettiń parlamentpen konstrýktıvti jumys isteýi qajet ekenin atap ótti.

– Depýtattyq korpýs Ulttyq jospardyń tabysty júzege asýy úshin barlyq qajetti zańnamalyq bazany qamtamasyz etýge tıis, – dedi prezıdent.