Qaraǵandyda mektep muǵalimi oqýshylarǵa otbasylyq búdjet týraly shyǵarma jazýǵa tapsyrma bergen. Balalar óz shyǵarmalarynda ata-analarynyń jalaqylaryn jasyrmaı jazypty. Bul shyǵarmany kórgen ata-analar narazylyǵyn bildirdi. Muny jekeniń ómirine qol suǵý degen olar zańǵa sáıkes bilim salasynyń sheneýnikterin jaýapqa tartý qajet dep esepteıdi. Bul týraly 31 arnanyń "Informbúro" jańalyqtar baǵdarlamasy habarlady.

Shý oqýshylardyń "Otbasylyq búdjet" taqyrybynda jazǵan esseleri áleýmettik jelige shyǵyp ketken soń bastalǵan. Essede Qaraǵandynyń nómiri 68 mektebiniń tórtinshi synyp oqýshylary ata-analarynyń jalaqylary, komýnaldyq tólemderge ketetin aqsha men basqa da shyǵyndardy tizip kórsetken. Muny kórgen ata-analar azamattyq quqyqtyń buzylǵanyn aıtady. 

"Balam bizdiń jalaqyny sanamaq túgili, dúkenge barmaıdy. Muny meniń jeke ómirime qol suǵý dep bilemin. Buǵan múldem qarsymyn. Balalar otbasylyq búdjetke aralaspaý kerek. Bilim salasynyń sheneýnikteri bul jerde balanyń quqyǵyn buzyp otyr. Ata- ananyń  jalaqysy az bolsa, basqa oqýshylar erteń ony bólektep, saýsaqtaryn shoshaıtady. Sheneýnikter qylmystyq kodekstiń 147 -baby, jeke basqa qol suǵý degen zańdy umytqan sıaqty", - deıdi qaraǵandylyq ana Botagóz Omarova.

Shyǵarmany kórgen qarttar da jaǵalaryn ustady. Aıtýlarynsha, muǵalimder balany balalyq shaǵynan aıyrǵan.

"Bizdiń qaltamyzǵa qol suqqansha, oqýdy jetistirip alsyn. Nemerelerimniń ájesi retinde aıtarym, jaǵdaıymyz ońyp turǵan joq. Sabaq oqytsyn, ne sumdyq bul?!" - deıdi taǵy bir Valentına Petrova esimdi ana

"Balalar nege ata-anasynyń jalaqysyn bilý kerek? Oǵan nege bastaryn qatyrý kerek? Sabaqtaryn oqysyn", - dedi Irına Rassohova. 

Mektep ákimshiligi buǵan qatysty suhbat berýden bas tartty. Sebebi tapsyrma bilim bóliminen kelgen deıdi. Al sheneýnikter bundaı mazmundaǵy esseden habarsyz bolǵandaryn jetkizdi.

"Meniń oıymsha, bundaı tapsyrmany esse túrinde oqýshylarǵa berý durys emes. Odan da vıktorınalyq tapsyrmalar berilý qajet. Bul jerde muǵalim durys nusqaýlyq bermegen. Atalmysh jaǵdaıdy tekseremiz", - deıdi Qaraǵandy qalasynyń bilim bólimi basshysynyń mindetin atqarýshy Natalá Golovına. 

Sheneýniktiń aıtýynsha, qazir qaladaǵy barlyq mektepte qarjylyq saýattylyq aptalyǵy ótip jatqan kórinedi. Soǵan sáıkes ár mektep is- sharalar josparyn ózderi jasaıdy. Biraq bilim bólimi ony teksermeıtinderin jetkizdi.