Almaty oblysy elimizdiń aldyńǵy qatarly ındýstrıalyq óńirleriniń biri retinde óz pozısıasyn nyǵaıtyp keledi. Sońǵy úsh jarym jylda óńirde 6,7 trln teńgeniń ónimi óndirildi. 2024 jyly ónerkásip óndirisiniń kólemi 2021 jylmen salystyrǵanda 1,5 ese artty. Aǵymdaǵy jyldyń jeti aıynyń qorytyndysy boıynsha ónerkásip óndirisiniń ındeksi 106,6%-dy qurady.
Oblys ákimi Marat Sultanǵazıev damýdyń basym baǵyty shıkizattyq emes ekonomıka bolyp qala beretinin atap ótti: «Osy baǵyt turaqty ındýstrıalyq baza qalyptastyrýǵa jáne jańa óndiristerdi damytýǵa múmkindik beredi».
Óńir azyq-túlik ónerkásibinde jetekshi orynǵa ıe: elimizdegi kókónis shyryndarynyń 96%-y, balmuzdaqtyń úshten ekisi jáne súzbeniń jartysy Almaty oblysynda óndiriledi. Budan bólek, munda gıpsokarton óndirisiniń 80%-y shoǵyrlanǵan, eldegi jalǵyz temeki ındýstrıasynyń ortalyǵy jumys isteıdi jáne otandyq dári-dármek óndirisiniń 24%-y qamtamasyz etiledi.
2025 jyly quny 80 mlrd teńge bolatyn koreıalyq KT&G kompanıasynyń zaýyty iske qosylyp, 300 jańa jumys orny ashyldy. Aýyl sharýashylyǵy jalpy respýblıkalyq kólemniń 12%-yn quraıdy, al sońǵy úsh jylda shıkizattyq emes eksport kólemi 2 mlrd AQSH dollaryna jýyqtap, 2021 jylmen salystyrǵanda úsh esege artty.
İske asyrylǵan ınvestısıalyq jobalardyń qatarynda — Jiangxi Copper kompanıasynyń vólframdy qaıta óńdeý jobasy (135 mlrd teńge), Almaty Insulation jylý oqshaýlaǵysh zaýytynyń qurylysy (43,8 mlrd teńge) jáne Focus Logistics qoıma keshenderi (70 mlrd teńgege deıin).
2025 jyldyń sońyna deıin Almaty oblysynda jalpy quny 1,3 trln teńgeni quraıtyn 35 jańa joba iske qosylady. Olardyń ishinde — PepsiCo kompanıasynyń Lay’s zaýyty (71 mlrd teńge), LC Waikiki taratylym ortalyǵy (30 mlrd teńge), Qazaq Global Food zaýyty (16,5 mlrd teńge) bar.
Energetıka salasyna da erekshe kóńil bólinýde. Shelek aýdanynda qýattylyǵy 60 MVt jel elektr stansıasy, Qonaev qalasynda 110 MVt elektr stansıasy paıdalanýǵa berilýde. Bul sharalar energıa tapshylyǵyn azaıtyp, óńirdiń ónerkásiptik ósimin qoldaıdy.
Almaty oblysy ındýstrıalyq, agrarlyq jáne eksporttyq áleýetin nyǵaıtyp, óńir men el ekonomıkasynyń turaqty damýyna serpin berýde.
