2025 jyldyń birinshi jartyjyldyǵynda Almaty oblysynyń ekonomıkasyna salynǵan ınvestısıalar kólemi ótken jyldyń sáıkes kezeńimen salystyrǵanda 25%-ǵa artty. Sheteldik kapıtaldyń aǵymy shamamen bir jarym ese ósti. Bul óńirge tartylǵan qarajat kólemi boıynsha respýblıkada toǵyzynshy oryn alýǵa jáne qolaıly ınvestısıalyq ahýaly bar aımaq retindegi mártebesin rastaýǵa múmkindik berdi.
Alty aıdyń ishinde oblys ekonomıkasyna jalpy 421,6 mlrd teńge baǵyttaldy. Onyń úshten tórt bóligi búdjettik emes qarajattan quraldy. Bul jeke ınvestorlar men bıznes tarapynan óńirge degen senimniń joǵary ekenin kórsetedi.
Investısıalardyń basym baǵyttary
Negizgi qarjy ónerkásipke, jyljymaıtyn múlikpen jasalatyn operasıalarǵa, qurylys salasyna jáne bilim berý salasyna tartylýda. Shıkizattyq emes sektor turaqty ósim kórsetýde: munda negizgi kapıtalǵa salynǵan ınvestısıalar 298 mlrd teńgeden asyp, ótken jylmen salystyrǵanda 11,3%-ǵa joǵary boldy.
Sheteldik ınvestısıa tartýda da aıtarlyqtaı nátıjeler baıqalady. Aǵymdaǵy jyldyń birinshi toqsanynda olardyń kólemi 210,7 mln AQSH dollaryn qurady. Bul qarajattyń jartysynan astamy óńdeýshi ónerkásipke baǵyttaldy. Bul qadam óndiristik sektordyń uzaq merzimdi damýyna jáne halyqty jumyspen qamtýdyń artýyna negiz bolady.
İri jobalar jáne jańa jumys oryndary
2030 jylǵa deıin Almaty oblysynda jalpy quny 7,3 trln teńgeni quraıtyn 221 ınvestısıalyq joba júzege asyrylady. Olardyń iske asyrylýy shamamen 84 myń jumys ornyn ashýǵa múmkindik beredi. Tek 2025 jyldyń ózinde 35 jańa jobany iske qosý josparlanǵan. Olardyń ishinde – MP Solution logıstıkalyq kesheniniń, LC Waikiki kóterme-taratý ortalyǵynyń, «Shın Laın» balmuzdaq fabrıkasynyń jáne «Avtodrom Sokol» sport kesheniniń qurylysy bar.
Bıyldyń ózinde óńirdiń 540 turǵynyn jumyspen qamtyǵan tórt iri nysan paıdalanýǵa berildi. Olar – Gas Line tas óńdeý zaýyty, KT&G temeki ónimderi óndirisi, LC Waikiki kóterme-taratý ortalyǵy jáne «Labasy-A» kooperatıviniń asyl tuqymdy sharýashylyǵy.
Halyqaralyq brendter men otandyq jobalar
Investısıalyq saıasattyń mańyzdy baǵyty – halyqaralyq brendterdi tartý. BAKAD boıynda PepsiCo, Focus Logistics pen OZON, «Stroıtel 98» jáne KT&G kompanıalarymen yntymaqtastyq týraly memorandýmdarǵa qol qoıyldy. Kelisimderdiń jalpy quny shamamen 655 mln AQSH dollaryn quraıdy. Onyń ishinde keıbir jobalar iske asyrylyp úlgerdi, sonyń biri – bıylǵy sáýirde ashylǵan KT&G zaýyty.
Sonymen qatar, otandyq bastamalar da belsendi damyp keledi. Mańyzdy jobalardyń qatarynda – «Altyn Taǵa» temirbeton buıymdary zaýyty men Imagine Apple Logistics logıstıkalyq ortalyǵynyń qurylysy bar. Bul jobalar 1,7 myńǵa jýyq jańa jumys ornyn qurýǵa múmkindik beredi. Olardy aıaqtaý 2026 jylǵa josparlanǵan.
Indýstrıaldy aımaqtardyń róli
Ekonomıkalyq ósimdi yntalandyrýdyń mańyzdy quraldarynyń biri – ındýstrıaldy aımaqtar. Almaty oblysynda jalpy aýmaǵy 1,6 myń gektardan asatyn alty ındýstrıaldy aımaq jumys isteıdi. Bul jerlerde negizinen eksportqa baǵyttalǵan óndirister shoǵyrlanǵan.
«Bereke» ındýstrıaldy aımaǵynda jylyna 25 myń tonna jemis-kókónis ónimin óńdeýge qaýqarly FruitArt sýblımasıalyq zaýyty iske qosyldy. «Qaırat» ındýstrıaldy aımaǵynda shoıyn buıymdaryn, bolat symyn jáne jylý oqshaýlaǵysh materıaldaryn óndiretin kásiporyndar jumys isteıdi. Al «Shelek» pen «Qazbek bek» ındýstrıaldy aımaqtarynda jemis qoımalary men metal qurylymdaryn óndirý jobalary júzege asýda.
Aldaǵy jyldary ındýstrıaldy ınfraqurylymdy keńeıtý josparlanǵan. Qoldanystaǵy alańdarǵa qosymsha toǵyz jańa ındýstrıaldy aımaq ashylady. Sondaı-aq, aýmaǵy 100 myń gektarǵa jýyq arnaıy ekonomıkalyq aımaq qurylady. Munda tamaq ónerkásibi, toqyma, qurylys materıaldary óndirisi jáne logıstıka salalaryndaǵy jobalar júzege asyrylatyn bolady.
2025 jylǵa arnalǵan josparlar
2025 jyly Almaty oblysyna tartylatyn ınvestısıanyń josparly kórsetkishi – 1,35 trln teńge. Bul ótken jylǵy deńgeıden 23%-ǵa joǵary. Birinshi jartyjyldyqtaǵy serpindi eskere otyryp, óńirdiń jospardy oryndap qana qoımaı, asyra oryndaýyna da barlyq negiz bar. Bul Almaty oblysynyń ınvestorlar úshin Qazaqstandaǵy eń tartymdy óńirlerdiń biri mártebesin odan ári nyǵaıtady.
