Búgin Parlament Májilisiniń jalpy otyrysynda depýtattar «2021-2023 jyldarǵa arnalǵan respýblıkalyq búdjet týraly» zańnamalyq túzetýlerdi maquldady.

Otyrys barysynda depýtattar búdjetke qatysty birqatar ózekti suraqtardy kóterdi. Atap aıtqanda, sapasy syn kótermeıtin jol qurylysyna, onyń ýaqytyly aıaqtalýyna qatysty máselelerge erekshe mán berdi. Osy rette Nurlan Nyǵmatýlın:

–Jasyratyny joq, bárimiz qar túsip ketse de, jol  jóndep jatqanyn jıi   kórip   júrmiz. Keıde bir jyl ótpeı qaıtadan remont  jasap jatqanyn da kóremiz. Bul  neniń  kórsetkishi? Birinshiden, sapaly konkýrs ótkizý úshin, sapaly kompanıa tabý úshin ýaqyt jetispeıdi. Ekinshiden, barlyq jumystar asyǵys jasalady. Árıne, odan keıin eshqandaı sapasy da bolmaıdy. Al, búdjetten qansha aqsha ketip jatyr. Ótken  aıda ol týraly Prezıdent te aıtty. Qazirde 140 mlrd. Taǵy bereıin dep  otyrmyz, - dedi

Sonymen qatar, Palata Spıkeri Indýstrıa jáne ınfraqurylymdyq damý mınıstrine osynsha qarajat bólgennen keıin, nátıje, ıaǵnı, sapaly joldar bolý  kerektigin aıtty.

Respýblıkalyq búdjet týraly zańnamalyq túzetýler boıynsha qorytyndy jasaǵan Nurlan Nyǵmatýlın búdjet – elimizdiń turaqty damýyn, halqymyzdyń áleýmettik jaǵdaıyn qamtamasyz etýdiń kepili ekenin alǵa tartyp, bul qujat árqashanda Májilis qaraýyndaǵy eń mańyzdy, eń jaýapty zań jobalardyń biri ekenin aıtty.

– Búgingi búdjette ádettegideı áleýmettik qoldaýǵa, densaýlyqqa, bilim, eńbekpen qamtý salalaryna, jáne jol qurylysy, taǵy basqa da mańyzdy baǵyttardy júzege asyrýǵa qosymsha qarajattar qaraldy. Osynyń barlyǵy, Elbasy Nursultan Ábishuly Nazarbaevtyń strategıalyq bastamalaryn, Memleket Basshysy Qasym-Jomart Kemeluly Toqaevtyń sesıanyń ashylýynda bergen tapsyrmalaryn júzege asyrýǵa yqpal etedi. Endigi mindet – osy bólingen qarajattardy alǵa qoıǵan maqsattarǵa tıimdi paıdalaný. Árıne, bul suraqtar Májilis depýtattarynyń da baqylaýynda bolady, - dedi.

Aıta ketý kerek, atalǵan zań jobasy 2021-2025 jyldarǵa arnalǵan makroekonomıkalyq kórsetkishter boljamynyń naqtylanýyna baılanysty ázirlenip, «Nur Otan» partıasynyń saılaýaldy baǵdarlamasyna, Memleket Basshysynyń Joldaýyna jáne koronavırýstyq ınfeksıamen kúres jónindegi is-sharalardy iske asyrýǵa baǵyttalǵan.