Elimiz Táýelsizdik alǵaly Mańǵystaý oblysy halqynyń sany eki ese ósken. Búginde qazynaly túbekte 720 myńnan astam turady. Búgin Aqtaýda ótken oblystyq qoǵamdyq keńesi otyrysynda óńirdiń 30 jylda jetken basty jetistikteriaıtyldy.

Oblys ákimi S.Trumovtyń aıtýynsha, halyq sanynyń kóbeıýine baılanysty qalalar aýmaǵy keńeıip, jańa aýyldar men tutas bir aýdan paıda boldy. Munaıly aýdany - elimiz Táýelsizdik alǵannan keıin Qazaqstanda qurylǵan alǵashqy aýdan. Ol kezde aýdan halqynyń sany 53 myń bolsa, osy kúni Munaılynyń 174 myń turǵyny bar.

Táýelsizdik jyldary óńirdiń áleýmettik salasynda da oń ózgerister oryn aldy. Máselen, 1991 jyly óńirde 151 balabaqsha jumys istese, 2020 jylǵa qaraı olardyń sany 311-ge jetken. Sonymen qatar, orta bilim beretin mektepter sany 1,5 ese ósken. Qazir aımaqta 140-tan astam mektepte oqýshylarǵa sapaly bilim men tárbıe berilip jatyr.

Aımaq basshysy S.Trumov 30 jylda densaýlyq saqtaý salasy da eleýli ózgeristerge ushyrap, óńirde joǵary medısınalyq  tehnologıalarymen qarýlanǵan, tálimi zor, tájirıbesi mol mamandary bar emhanalar, aýrýhanalar ashylǵanyn aıtty.

«Egemen alǵannan beri oblysymyzda 150-den astam densaýlyq saqtaý nysany iske qosylǵan.Ozyq úlgidegi Ana men bala úıi, qan ortalyǵy, kardıo hırýrgıa ortalyǵy men onkologıalyq dıspanser ashylyp, em alý úshin alysqa sabylatyn turǵyndarǵa oblys aýmaǵynda emdelip, kúrdeli otalardy jasaýǵa múmkindik týdy. Byltyr jedel-járdem avtoparki 100%-ǵa jańaryp, talapqa saı, qajetti medısınalyq quraldarmen tolyq jabdyqtalǵan jańa kólikter satyp alyndy»,- dedi S.Trumov.

Táýelsizdik jyldarynyń taǵy bir jemisi - Mańǵystaýdyń shekaralyq oblys retinde tranzıttik, kóliktik-logıstıkalyq jáne ınfraqurylymdyq áleýetiniń artýy. El astanasynan shalǵaıda, túbekte jatqan Mańǵystaýda temir joly, teńiz jáne avto joldar qatar damyp, búginde toǵyz joldyń torabyna aınaldy.

Táýelsizdik tarıhynda tuńǵysh ret Kavkaz, Túrkıa arqyly Eýropa elderine jańa baǵyt ashyldy. Úsh memleketti jalǵaıtyn «Ózen–Bereket–Gorgan» halyqaralyq temir jol dálizi ashyldy.

«Mańǵystaý oblysy turǵyn úı qurylysy boıynsha jaqsy jetistikterge qol jetkizdi. Táýelsizdik alǵaly beri Mańǵystaýda 11 mln. 333myńnan astam sharshy metr turǵyn úı paıdalanýǵa berilgen. Táýelsizdik jyldarynda oblystyń jalpy óńirlik ónimi 48 ese ósti.  Al jan basyna shaqqandaǵy kórsetkish  23 esege artqan. Jalpy, 2005 jyldan bastap Mańǵystaý oblysynda shaǵyn jáne orta bıznesti damytýdyń oń dınamıkasy baıqalady. Sońǵy 15 jylda shaǵyn kásipkerlik sýbektileriniń sany 3 ese ulǵaıdy»,- dedi S.Trumov. 

Jıyn barysynda sóz alǵan oblystyq qoǵamdyq keńesiniń múshesi Jánibek QojyqTáýelsizdik alǵannan keıin elimizde Ata Zańymyz qabyldanyp, shekaramyz belgilengenmen qatar táýelsiz sana qalyptasa bastaǵanyn aıtady. Ol jasampazdyq jolynda Mańǵystaýdyń da jetken jetistikteri az emestigin tilge tıek etti. «Táýelizdik alǵanǵa deıin Mańǵystaýdyń bir de bir aýylynda gaz joq bolatyn. Sońǵy 20 jylda Mańǵystaý 100 paıyz qamtyldy. Bul respýblıka boıynsha birinshi kórsetkish»,-dedi J.Qojyq.

Bıylǵy mereıli jyl aıasynda oblysta «El ıgiligi úshin!» jobasy bastaldy.  Joba óńir turǵyndary úshin asa qajetti áleýmettik mańyzy bar nysandar men sharalardy júıeli iske asyrý úshin jasaqtalǵan.

Jyl basynan beri oblys turǵyndaryna tamasha tartýlar jasalyp jatyr. Aýyldarda sport keshenderi, jańa saıabaqtar ashylyp, sýburqaqtar iske qosyldy. Aqtaýda Tuńǵysh Prezıdent saıabaǵynyń qurylysy bastaldy.

Jyl sońyna deıin taǵy birqatar óndiristik jáne áleýmettik-mádenı nysandardy halyq ıgiligine tapsyrý kózdelýde.

«Aýyl – El besigi» jobasy aıasynda jalpy 3 mlrd. teńgege 102 shyqyrym jol salynyp, ortasha jóndeý jumystary júrgiziledi. Jańa oqý jylynda eńseli mektepter men bala baqshalar paıdalanýǵa beriledi dep kútilýde.