Memleket basshysynyń tapsyrmasy aıasynda Shymkent qalasynda bilim berý ınfraqurylymy damyp keledi. «Turan» shaǵynaýdanyndaǵy jańadan paıdalanýǵa berilgen №79 jalpy orta mektebiniń merekege arnalǵan «Táýelsizdik jetistikteri» atty saltanatty jıynynda qala ákimi Murat Áıtenov osylaı dedi.

Barsha ustazdar men shákirtterdi Bilim kúnimen jáne jańa mekteptiń ashylýymen quttyqtaǵan qala basshysy mektep tabaldyryǵyn alǵash ret attap otyrǵan birinshi synyptyń búldirshinderine sáttilik tilep, olarǵa álippe tabystady.

MURAT ÁITENOV, SHYMKENT QALASYNYŃ ÁKİMİ
- Bıylǵy jańa oqý jyly Qazaqstan Respýblıkasy Táýelsizdiginiń 30 jyldyq mereıtoıy qarsańynda bastalǵaly otyr. Táýelsizdik jyldarynda Shymkent qalasynyń bilim salasy úlken jetistikterge jetti. Osydan otyz jyl buryn qalada 69 myń oqýshysy bar 72 mektep bolsa, qazir 233 myńnan asa oqýshy oqıtyn 203 mektep bar. Bıylǵy oqý jylyn qala mektepteri 233 879 oqýshymen bastaǵaly otyr. Ótken jylmen salystyrǵanda 8 myń oqýshyǵa kóp. Onyń ishinde 25 myń oqýshy alǵash ret mektep tabaldyryǵyn attady.

Qala ákimi balalardyń qaýipsizdigin qamtamasyz etý úshin mektepter beıne baqylaý júıesimen jabdyqtalyp, týrnıketter qoıylyp, dabyl batyrmalary ornatylǵanyn, mektepterdiń materıaldyq-tehnıkalyq bazasyn nyǵaıtý boıynsha jumystar júıeli túrde júrgizilip keletinin aıtty. Sonymen birge, jańa modıfıkasıalanǵan jabdyqtarmen qamtamasyz etý maqsatynda 263 kabınet, 178 ınteraktıvti taqta ornatý jumystary júrgizildi. Nátıjesinde, jańa modıfıkasıalanǵan jabdyqtarmen qamtylǵan pán kabınetter úlesi 32,5%-dan 65%-ǵa jetti. Bul jumystar jalǵasyn tabatyn bolady.

Qala ákiminiń qatysýymen ashylǵan mektepte 897 oqýshy bilim alatyn bolady. Shahar basshysy aýyl qarıalarymen birge jańa mektepti aralap, ondaǵy sport zal, Abaı synyby, shahmat, eńbek, tigin sherberhanalary men asqanany aralap kórdi. Qurylystyń sapasy men dızaınyna mán bergen Murat Áıtenov mundaǵy jumystarǵa oń baǵasyn berdi. Mektep dırektoryna sanıtarlyq sharalardyń saqtalýyn qamtamasyz etýdi tapsyrdy.

Zaman talabyna saı jabdyqtalyp, balalardyń tolyqqandy bilim alýyna, salaýatty ómir saltyn qalyptastyrýyna jaǵdaı jasaıtyn 1200 oryndyq oqý orny 3 qabattan turady. Eki aýysymda jumys júrgizetin mektepte 44 oqý bólmeleri qarastyrylǵan. Budan basqa jańa úlgidegi 8 mýltımedıaly-lıngofondy kabınet, 3 ınformatıka kabıneti, ol 85 dana kompúter jáne 3 ınteraktıvti taqtamen jabdyqtalǵan. Sondaı-aq, 4 sheberhana bólmesi, salaýatty ómir saltyn qalyptastyrýǵa arnalǵan sport zal men balalardyń densaýlyǵyn qadaǵalaıtyn eki medpýnkt qarastyrylǵan.

Aıta keteıik, pandemıaǵa baılanysty bilim tabaldyryǵyn alǵash attaǵan búldirshinder úshin ǵana mektep aýlasynda alǵashqy qońyraý saltanatty jıyny ótti. Qalǵan synyp oqýshylaryna sanıtarlyq talaptardy saqtaı otyryp, synyp saǵaty uıymdastyryldy.