Májilis tóraǵasy Nurlan Nyǵmatýlın bastaǵan parlamenttik delegasıa 6-8 qyrkúıek aralyǵynda Vena qalasynda ótetin Besinshi dúnıejúzilik parlamentter spıkerleriniń konferensıasyna qatysady.

Parlamentaralyq odaq, Avstrıa parlamenti BUU-men ózara is-qımyl kezinde uıymdastyrǵan forýmda parlamentshiler, atap aıtqanda, pandemıadan keıingi damý, onyń ishinde klımattyń ózgerýimen kúresý jáne ekologıalyq turaqtylyqty qamtamasyz etý úshin ekonomıkany reformalaý týraly pikir almasady.

Parlament ókilderi kópjaqty qatynastardy nyǵaıtý, beıbitshilik pen turaqty damýdy qamtamasyz etý úshin dıalog, ózara túsinistik jáne yntymaqtastyq qaǵıdattary negizinde negizgi parlamenttik is-qımyldardy anyqtaıdy. Osy taqyrypta ótkiziletin ınteraktıvti jalpy pikirtalastarda májilis spıkeri Nurlan Nyǵmatýlınniń sóz sóıleýi josparlanǵan.

Sonymen qatar, Nurlan Nyǵmatýlınniń Eýropa jáne Azıa parlamentteriniń, halyqaralyq parlamenttik uıymdardyń basshylarymen, sondaı-aq ulttyq delegasıalardyń ókilderimen eki jaqty kezdesýleri qarastyrylǵan.

Parlament spıkerleriniń árbir bes jyl saıyn ótkiziletin Dúnıejúzilik konferensıasy qaýipsizdik, ekonomıkalyq jáne áleýmettik damý, halyqaralyq quqyq jáne adam quqyqtary, demokratıa jáne genderlik teńdik máselelerin talqylaýǵa arnalady.

Májilistiń baspasóz qyzmeti