Bokstan Qazaqstan komandasynyń bas bapkeri Ǵalymbek Kenjebaev óz erkimen qyzmetinen ketti. Bul týraly ol óziniń áleýmettik jelidegi paraqshasynda málimdedi.

– Ulttyq quramanyń bas bapkeri qyzmetinen óz erkimmen kettim. Basshylar otstavkaǵa qol qoıdy. Eshkimge ókpe joq. 2,5 jyl jumylyp eńbek ettik. Komandada tájirıbeli bapkerler de, ysylǵan boksshylar da boldy. Qolymyzdan kelgenin istedik. Eshkimniń jelkesinen súırep, chempıon qylǵam joq. İrikteýden eldegi eń myqty degen boksshylar ótti. Olımpıadaǵa nege barmaı qalǵandaryn ol jigitter jaqsy biledi, adam óz kemshiligin moıyndap úırengeni durys.

Bizdiń qalaýymyz bola bermeıtinin olımpıada kórsetti. Eń bir ókinetin tusym – Sabyrhan Mahmudqa múmkindik bere almaǵanym. Biraq, Sabyrhan sekildi jigitter asyl tas sekildi, sý túbinde kóp jatpaıdy, baǵy jansa, halyqaralyq rıngte qazaqqa áli talaı júlde syılaıdy. Men Mahmudqa shyn kóńilimmen tilektespin. Elimiz aman bolsyn. Qazaq boksyna sáttilik tileımin, – dedi Ǵ. Kenjebaev.

Ǵalymbek Kenjebaev ulttyq quramanyń bas bapkeri qyzmetine 2018 jyldyń jeltoqsanynda taǵaıyndalǵan bolatyn.

Tokıo olımpıadasynda qazaqstandyq boksshylardyń birde-biri fınalǵa shyǵa alǵan joq. Boksshy Qamshybek Qońqabaev pen Sáken Bıbosynov qola júlde ıelense, qalǵan 6 boksshy jartylaı fınalǵa jetpeı jeńilip qaldy. Osylaısha otandyq bylǵary qolǵap sheberleri táýelsizdik alǵan jyldan beri alǵash ret elge altyn medalsiz oraldy.