«Nur Otan» partıasy tóraǵasynyń birinshi orynbasary Baýyrjan Baıbek elbasy, partıa lıderi Nursultan Nazarbaevtyń tapsyrmasy boıynsha óńirlerge saparyn jalǵastyrýda. Búgin ol saılaýaldy ýádelerdiń Qaraǵandy oblysynda oryndalý barysymen tanysty.
Onyń aıtýynsha, memleket basshysy Qasym-Jomart Toqaev jarıa etken «Ózgerister joly: Ár azamatqa laıyqty ómir!» atty Saılaýaldy baǵdarlama aıasynda oblysta 5 jylǵa josparlanǵan 1814 is-sharanyń 25%-ti oryndalǵan. Jyl basynan beri 308 myń sharshy metr turǵyn úı, 72 km gaz qubyry, 46 km sý qubyry jáne káriz jelileri salynǵan, 1,4 myń km jol jóndeýden ótken. 4 jańa mekteptiń qurylysy aıaqtalýda. Kásipkerlikti damytý maqsatynda 60,4 mlrd teńge somaǵa myńnan astam jobaǵa qarjylyq qoldaý kórsetilgen. 20 myńnan astam jumys orny ashylǵan.
Saılaýaldy baǵdarlamada aýyldyq jerlerdegi daryndy balalardy anyqtap, qoldaý kórsetýge erekshe nazar aýdarylǵanyn eskere otyryp, Baýyrjan Baıbek fılıal tóraǵasy, oblys ákimi Jeńis Qasymbekpen birge Osakarovka kentindegi «Jastar» balalar-jasóspirimder ortalyǵy janyndaǵy jańartylǵan tehno ortalyqta boldy.
«Saılaýaldy baǵdarlamany iske asyrý aıasynda munda kúrdeli jóndeý júrgizilip, zamanaýı jabdyq satyp alynǵan. 654 bilim alýshy úshin 26 tegin úıirme, onyń ishinde baǵdarlamalaý stýdıasy, robototehnıka, jasandy ıntellekt, balama energetıka zerthanalary jáne basqalary qoljetimdi. Oqytýshylar arasynda «Dıplommen aýylǵa» baǵdarlamasy aıasynda týǵan jerine oralǵan Nur-Sultan, Almaty jáne Qaraǵandy qalalary joǵary oqý oryndarynyń túlekteri kóp ekenin atap ótkim keledi», – dep jazdy ol Facebook-tegi paraqshasynda.
«Nur Otan» tóraǵasynyń birinshi orynbasary atap ótkendeı, aǵa býynǵa qamqorlyq tanytý – partıa basymdyqtarynyń biri. Búginde Qaraǵandy oblysynda 200 myńnan astam egde jastaǵy adam turady. Sondyqtan Qarttar kúni qarsańynda ol Qaraǵandyda «Ardagerlerdi ardaqtaıyq» partıalyq jobasy aıasynda ashylǵan Belsendi uzaq ómir ortalyǵynda boldy. Munda aǵa býyn úshin lıngafon synyptary, bı jáne sportpen aınalysý zaly, sondaı-aq shyǵarmashylyq jáne oqý synyptary qoljetimdi. Qart kisilerdi belsendi qoǵamdyq ómirge tartý úshin mundaı ortalyqtar búkil el kóleminde ashylatyn bolady.
Baýyrjan Baıbek óz postynda partıanyń saılaýaldy baǵdarlamasynyń taǵy bir mańyzdy baǵyty – erekshe qajettilikteri bar balalardy qoldaý jaıly atap ótti. Onyń aıtýynsha, Elbasy tapsyrmasymen qolǵa alynǵan «Kedergisiz keleshek» jobasy aıasynda 2025 jylǵa deıin kolejder men joǵary oqý oryndarynda, sondaı-aq mektepter men mektepke deıingi uıymdardyń 70%-tinde ınklúzıvti bilim berýdi endirý boıynsha mindet qoıylǵan.
«Osy bastamany júzege asyrýǵa «Bolashaq» korporatıvtik qory ólsheýsiz úles qosýda. Búgin Qaraǵandyda №5 jáne №102 mektepterde ınklúzıany qoldaý kabınetterine baratyn oqýshylardyń ata-analarymen kezdestim. Ata-analardyń aıtýynsha, zamanaýı ádistemeler men bolashaqtyqtar oqytqan mamandardyń arqasynda balalardyń áleýmettik jáne akademıalyq daǵdylary jaqsaryp, minez-qulqyndaǵy problemalary azaıǵan», – dedi ol.
Jalpy, «Bolashaq» qory óńirlerde 59 mamandandyrylǵan ońaltý mekemelerin ashyp, jabdyqtaǵan, onyń ishinde 22 qalada 43 ınklúzıany qoldaý kabınetin ashqan. 2 myńnan astam erekshe bilim alýǵa qajettiligi bar bala qamtylǵan. Olardyń kópshiligi sóıleýdi úırenip, óz betinshe oqýǵa kóshken, ártúrli jarystar men olımpıadalardyń júldegerleri atanǵan.
Osy oraıdy paıdalana otyryp, Baýyrjan Baıbek erekshe balalardyń ata-analaryna «Bolashaq» qory aǵylshyn tilinen qazaq tiline tikeleı dýblájdaǵan múltfılmderdiń dıskilerin tartý etti. Elbasynyń tikeleı qoldaýymen bolashaqtyqtar «Ózińnen basta» jobasynyń aıasynda sońǵy 10 jylda eń joǵary standarttar boıynsha memlekettik tilge 37 kınokartınany dýblájdady.
Sol kúni partıa tóraǵasynyń birinshi orynbasary Qaraǵandy, Shyǵys Qazaqstan jáne Pavlodar oblystarynda saılaýaldy ýádelerdiń iske asyrylý barysyn qarastyryp, onlaın-formatta keńes ótkizdi. Taldaý kórsetip otyrǵandaı, jekelegen tarmaqtar boıynsha jyl sońyna deıin oryndalmaı qalý qaýpi bar. Baýyrjan Baıbek fılıaldar basshylyǵy men máslıhattardaǵy fraksıalardyń nazaryn osy baǵyttaǵy jumystardy kúsheıtý qajettigine aýdardy.
